Ka Seng HYC hynne ka sngi Saitjaiñ ka la pynlong ia ka jingialang iamir jingmut ha Khasi National Dorbar Hall, Mawkhar halor u droks bad ki Nongialam Shnong, ki Seng Longkmie, ki Seng Samla bad kiwei ki kynhun jong ki shnong ba hap hapoh Sor Shillong bad khap sor ha ryngkat ki kmie ki kpa jong ki samla kiba lah ngop ha u droks. La wan ban don ryngkat ruh da ki Nongmihkhmat na ka Manbha Foundation bad VHAM, kiba dei ki Seng kiba trei halor kine ki bynta.
Na katei ka jingialang la ioh ia ka jingai jingmut jong kiba bun bad ka Seng kan leit ban rah sha ka Sorkar ban buh ia ki jingdawa ba ka Sorkar ka dei ban pynurlong bad lada ka Sorkar kam pynsngap, ka Seng ha ryngkat ki paidbah kan sa pynlong ruh ia ki Prokram iakhih ki bapher bapher pyrshah ia ka Sorkar. Na ka liang ka Seng ka la pynbna ruh ha kane ka sngi ba ka sorkar Meghalaya ka don ia kata ka Drug Reduction Elimination & Action Mission (DREAM). Hynrei Kumba long ka kyrteng DREAM, kumta hi ruh ki kam ki shu kut tang ha jing phohsniew khlem da don ki kam, ong ka HYC, ki la ong ruh ba ki phohsniew ban rat dyngkhong ia u drok hynrei khlem trei pat da ki kam, kam don jingmut bad kita ki jingthrang ka Sorkar kin shu sahkut tang kum ki jingphohsniew.
Ka HYC ka byrngem ba kan wan rah hi noh da ki kam/ Mission ban pynurlong ia ki jingdawa jong ka Seng bad ia ki kyndon ba la thoh hapoh ka DREAM jong ka Sorkar. Ka kyrwoh lyngba u Bah Rhembor G Saibon General Secretary, HYC-CEC, la ong ruh ba kin sa leit ban buh da ka Dorkhas hakhmat ka Sorkar Jylla ban pynsngew halor kine ki mat jingdawa.