Ka Seng United Hynniewtrep Movements (UHM ) hynne ka sngi ka 19 tarik Nailur 2025 ka la wan iakynduh ia ka DGP ka Kong Idashisha Nongrang halor ka jingjyllei ki kam sniew ha ka jylla .
Haba kren sha ki lad pathai khubor na ka liang u President ka UHM u Bah Charlie J Rani u la ong ka Seng ka la ioh ban pynsngew ha i DGP haba iadei bad ka jingjia ha kine ki sngi khamtam haba iadei bad ka jingjia ia i hepbrit ka ba dang shu jia shen, ka jingshah pyniap iwei i longkmie bad i khyllung ha Mawiong, ka jingjah u Samla na Mawlai Mawtawar bad kine ki dei kiei kiei kiba la ioh ban pynsngew ha i DGP.
Nalor kata u la ong kumba ka Ri khasi ka dei ka ri kaba tip briew tip blei, tip kur tip kha kaba shongsuk shongshngain ,hynrei mynta ka la ima palat, namar ka jingpyniap kam don jingeh shuh ia ki riewthrang snam, bad ka Seng ka la pynsngew ha i DGP ban pynkhlaiñ ia ki bor pahara ban wanrah ia ka jingiada ka ba biang. Ka Seng ka la pynsngew ruh halor ka jingsahteng ki case ha kaba ki bahaing bahasem jong kine kiba ngat ia ka jingjia kin ioh noh ia ka jingsuk namar haduh mynta ki shong ha ka lyngngoh bad ha umdum.
Ka Seng ka la ioh ruh ban pynsngew halor u drok namar ka jingjur u drok ka la long shaba palat bad kaba ishyrkhei, namar ki khun samla ki bun kiba la ngop ha une u jingdih pynbuaid, bad ka Seng ka kyrpad ia ka DGP ban pynkhlain shuh shuh ia ka ANTF bad ka Seng ka la ong lada donkam ha kano kano ka por ka Seng ka long kaba kloi ban iatreilang bad ka tnad Pulit bad ka ANTF.
Ka Seng ka buh ruh ka jingkyrpad ban pynkhlain shuh shuh ia ka ain haba iadei bad kine kiba supply drok namar tang katto katne por ki la lait bad ka Seng ka kyntu ban pynkhlaiñ shuh shuh ia ka ain ban nym pynlait ia kine kiba supply drok.
Kaba khatduh ka Seng ka la ioh ban pynsngew ruh halor ka jingjia sha Delhi bad ha kiwei ki jylla ha kaba uwei na ki khun samla na Mawlai u la iap bad ka DGP ka la ong haba iadei bad ki jingjia shabar ka jylla ka tnad Pulit ka shimkhia mardor ban pynsted ia ka jingtohkit.
