Katba ki kor teknology ki dang tyllun sted na ka bynta ban pynsuk ia u briew, hynrei kane ka jingsuk ka wallam ruh ia ki kam bymman ha kaba bun ki briew ki la shah shukor ha ki ‘riew shim kabu lyngba ka phone call bad online (Direct Message, Facebook, Instagram etc).
Namar ka jingkiew sted kane ka kam sniew, u Bah Vivek Syiem Superintendent of Police East Khasi Hills District, hynne ka sngi u la mih shakhmat ban pynsngewthuh paidbah ba ki nongshong Shnong ki dei ban long kiba adkar ha kane ka bynta namar la mih bun palat ki kam thok ban kamai pisa khlem dei hok. U Bah Vivek u la iathuh ba kham bun ki briew kiba la shah pynngop ha kane ka kam ki dei na nongkyndong. U la pynshai ruh ba kane ka kam sniew ka wan na kiwei ki Jylla kum na Jharkhand, Haryana bad West Bengal.
U SP u pynpaw ruh ka jingdiaw ba ki briew kiba ngat ha kane ka apot kim ju pyntip ha ka khyllipmap ba ki shah phone ne poi message thok ba ki jop ia kata kata ne ba u nombor phone jong ki, ki jop ia ka jingkhalai nusip na ki company ba heh ha India bad shabar India, hynrei khambun na ki briew kiba liat ha kane ka jingriam ki pyntip ha ki bor pulit hadien ba ki la shah thok, kata hadien ba ki la phah pisa lyngba ka gpay ne siew lyngba ki bank account ha ki tnad bank bapher bapher.
Katkum ka jingiathuh u Bah Syiem, la ong ba bun ki briew kiba ngat ha kane ka apot kim ju nud ban iathuh wat ha īing ruh namar kitei ki nongshim kabu ki byrngem ban pynngat ha ki bor ka aiñ ne bor pulit. “Kumta ha kaba iadei bad kane, nga ai mynsiem bad kyntu ia ki paidbah ba kim dei ban tieng lada ngat kum ha kane ka apot, hynrei ban pyntip sha ngi ki bor pulit (anti cyber Crime) da kaba phone ha u nombor 1930 ha kano kano ka por”.
Shuh shuh u la iathuh ba kum kine ka jait jingeh, ki bor pulit ki la ïakhun katba lah ban pynduh jait da kaba kdew ruh ba dang shen la ioh kem ia uwei u briew uba leh ia kane ka kam na ka jylla Jharkhand. Nalor kata u la ban ruh ba man ka por, ki bor pulit ki la ai ia ki jinghikai bapher bapher ha kaba iadei bad kane ka bynta kata lyngba ki rynsan Social media bad ha ki Shnong.