Lap ba duna briew ka tnat pulit traffic, shem shitom ki Pulit ban pynïaid kali ha Jowai
Ka sor Jowai katba dang mih ki sngi kala nang khapñiah na ka jingbun palat ki kali ki mator nalor ka jingrit u surok bad ka jingdon ki nongshong die jingdie ha shi lynter jong ki lynti ïaid kjat kaba la pynthut shisha ïa ka ïaid ka ïeng jong ki paidbah ba bun ba lang.
Halor kane na ka liang ka Dorbar Shnong Tympang Iawmusiang, Jowai ha ryngkat ki bor pynïaid kali ka Jowai Police Station kila pynlong ïa ka jingleit jurip ‘Joint Inspection’ ïa ki stand kali kiba don ha ki bynta ka Iawmusiang bad la lap shisha ïa ka jingbym biang ka rukom pynïeng kali ha ki stan bad kane kala wan rah ïa ka jingsah kut kali kaba man ka sngi.
Na ka liang u Waheh Shnong ka Iawmusiang Tympang u ma Ajoy Lywait haba kren sha ki lad pathai khubor hadien jong ka jingwan jurip, ula ong naduh ka bynta ka lad Thomas Jones Synod College la lap ba ka rukom pynïeng stand kala long haduh ar-ar laiñ.
Ha ki bynta ka jong ka surok sha Wah Nangbah la ai jingmut ban pynkylluid ïa ka surok da kaba ym shah shuh ïa kiba pynïeng kali harud, ka surok ba leit na lad DC ophis sha Pohskur Mission Compound kumba long mynta ki kali kamai ki la ïeng haduh 2 laiñ bad la kyntu ïa ka tnad pulit ba kan pynïaid tang shilaiñ.
Katba na DC (point) sha H.K. Sing School la ïakren ba ym dei ban shah ïa ki kali ban pynïeng harud surok, khnang ban lait na kino kino ki jingeh bad ha ki bynta jong ka stand War kaba la jur bha ka jingdheng kali na ka daw ka jingbym biang ka rukom rung bad ka rukom mih, la dawa na ka tnad pulit ba ka dei ban buh kumba 2 ngut ki pulit pynïaid kali.
Ha ka jingïadei bad ka jingbym biang ka rukom pynïaid kali jong ka tnad pulit Jowai u ma Ajoy ula pynsngew ba la ïoh jingtip ba ka tnad pulit kala don mynta hapdeng ka jingduna (shortage) kaba jur bha jong ki pulit pynïaid kali, kiba la hap ban peit tang da uwei u pulit haduh ar le lai tylli ki bynta.
Shuh shuh ula ong hadien ba ka Dorbar Shnong kala dep ban ujor sha u DC halor ka jingshong die jingdie ha ki lynti ïaid kjat, na ka liang u DC ruh ula dep ban pynmih ïa ka hukum ha ka 21 tarik ban mana ba ym shah shuh ban shong die ha ki lynti ïaid kjat, ula ong ruh ba na ka liang ka tnad Municipal ruh kala dep ban jurip ïa kane hynrei tang katto katne por ki nongdie kila poi biang ha kitei ki jaka shnong, ula pyntip ba ka shnong ka dang ïaid buddien ïa kane, la ong u ma Ajoy Lywait.