Ka Dorbar Shnong Mawlangwir, South West Khasi Hills District (SWKHD) ryngkat ka Seng Samla, Seng Kynthei, ka VDP, lem bad ka HYC Mawlangwir Unit, ki la pynlong ïa ka jingpynkup burom ïa u samla Kisen Wanniang hadien ka jingioh pdiang khusnam Pradhan Mantri Rashtriya Bal Puraskar na ka President jong ka ri India, ka Droupadi Murmu ha ka 26 tarik u Nohprah, 2024, ha Rashtrapati Bhavan, New Delhi.
Kum ban shu pynkynmaw, katei ka khusnam ka dei lyngba ka mynsiem shlur bad kheiñduh khlem pyrkhat 2 sien ialade, kata da ka jingpyllait im ïa saw ngut ki mynsiem ba kordor na ka jingngam jyllop ha ka Wah Maweitksar, Mawlangwir, SWKHD.
U Myntri Shnong Mawlangwir, u Bah N.S. Wanniang, u la ai ka jingkyrkhu bad ban pynshlur ïa une u samla ba un nangleh ki kam ba shlur bad ban long u nongsamaria ïa kiwei. Nalor kata, u la kyntu ïa u samla Kisen ba un iai long u ba sngewrit wat lada u la ïoh pdiang kat katei ka burom.
Na ka liang ki Nongïalam Seng Samla Shnong, Mawlangwir ki la ai Khublei bad pynpaw ia ka jingsngewnguh ia une u ‘riewshlur ryngkat ki kyntien kyrkhu kyrdoh ba un iai bteng ruh ia kane ka kam kaba bha na ka bynta ka jingmyntoi ka imlang sahlang bad ka burom jong ka dong ka thaiñ. Ki la iaroh ruh ia u samla Kisen ba lyngba kane ka kabu bad ka kam ba bha, kiwei ki Jylla kin tip shaphang ka shnong Mawlangwir, Mawkyrwat kaba don ha ka District South West Khasi Hills.
