Ka Khasi Students’ Union (KSU) Barato Unit hynnin ka sngi 13/07/2024 ka leit ïa kynduh ïa u Doctor in charge ka Barato Primary Health Center (PHC) hadien ka jingïoh pdiang ïa ki jingujor na ki paidbah ka thaiñ ba u Doctor jong katei ka PHC u juh kren tohmet ïa ki paidbah ba wan wad dawai wad jingsumar na ka PHC.
Na ka liang jong ka seng kala ïakren bad une u Doctor ba nangne sha khmat ym dei shuh ban dang ïai jia namar ma u kum u Doctor bala nang lah stad u dei ban sngewthuh ïa ki paidbah bad la kyntu ruh ba lada ki paidbah kim burom markylliang u dei ban ai jingtip sha ki nongïalam jong ka shnong ban peit ïa kane.
Hadien ka jingïakren ka seng kala jurip ïaka jinglong long jingman jong kane ka jaka ai jingsumar bad la lap ïa shibun ki jingduna jong kane ka PHC naduh ka Um, ki Nongtrei ki kamra ba ban pyndonkam bad u surok.
Ka seng ka kyntu jur ïa ki bor ba dei peit ban pynbiang ïa ki jingduna baroh bad ka seng kam kwah nangne shakhmat ban ïoh sngew ne lap ïa kum kine namar ym lah satia ban sngap bad ban peit ïaka jingud jingnam ki para doh para snam kiba shong ba sah ha kane ka thaiñ.
Ka Seng lyngba ki lad pathai khubor ka kyntu ïaka Health Department jong ka ka sorkar Jylla kane Primary Health Center (PHC) la dei ban pynkiew kyrdan noh sha ka Community Health Center (CHC) namar ka jingbun briew (population) kala biang palat namar tang ka PHC kamlah ban ai ïaka jingshakri ba paka ïaki paidbah babun kane thaiñ, pynkut ka kyrwoh na ka seng.