Ka Meghalaya Commercial Truck Owner & Driver Association (MCTODA) mynta ka sngi ka 18 tarik Naitung 2025 ka la pynlong ia ka jingialang ha Laitkor Shillong, ia ki trai truck bad ki driver halor ka jingkynduh ia shibun ki jingeh na ka por sha ka por.
Haba kren bad ki nongthoh khubor na ka liang u Chairman ka Meghalaya Commercial Truck Owner Driver Association u Bah Moskalander Marngar u la pyntip ka jingiakynduh ka kynhun mynta ka sngi ka long kum shi bynta ban iakren halor ka jingiakynduh jingeh.
Ka jingeh kaba nyngkong kaba ka kynhun ka iakynduh ka dei halor ka jingmih biang katto katne ki khyrdop khrong khajna kaba la pynduh thiah ia ka kynhun MCTDOA.
U la ong ka Association ka la phah da ka jingthoh sha ki bor pyniaid District ha ophis DC bad na ka liang ka ophis DC ka la ong ia ka kynhun ban pyntip ia kita ki khyrdop khrong khajna.
Na ka liang ka kynhun mynta ka sngi ka la shim ia ka rai ba lada ki dang pynthut pynwit, ka kynhun kan sa pyntip sha ki bor pyniaid jong ka sorkar bad kam dei ban sah tang ha ki jingpyntip hynrei ka dei ban shimkhia ia ka jingeh jong ka kynhun.
Shuh shuh u la kyntu ia kito kiba khrong khajna katba kim pat ioh jingbit na ki bor pyniaid District bad na ka sorkar kim dei ban pynbor ia ki dkhot jong ka Meghalaya Commercial Truck Owner & Driver Association (MCTDOA).
Haba khatduh u la ong ba ka Association mynta ka sngi ka la shim ia ka rai ba kan nym ai ia ka bai khrong khajna bad ka Association kan sa thoh sha ki bor pyniaid District jong ka Sorkar bad lada kam don kano kano ka jingpyni dak da ka lynti kaba dei, ka Association ka la long kaba khreh ban ialeh pyrshah ha kum kine ki bynta namar ba la mad shibun ki jingeh.
u Snem Kyndait Adviser ka MCTDOA na Jaintia Hills u la pyntip ba ka kynhun na Jaintia ka la pyntip ba ki iakynduh shibun ki jingeh bad ki la pynlong ruh ia ki jingiakhih ha ki khyndiat bnai ba la dep. Hadien kata u DC bad ki trai factory ki la khot ia ki nongialam jong ka MCTDOA na Jaintia Hills ban iakren bad ki la lap ba ki don artylli ki kynhun Association na East Jaintia Hills bad ka Jaintia truck owner Association ki la leit lud ia u coke na East Jaintia Hills bad ka kynhun MCTDOA Jaintia Hills ka la pyntip ba lada kim shah ban lud ia u Coke bad lada ki phah ia ki number truck sha ki factory bad lada kim ailad bad shah ia ki, ka MACTDOA na Jaintia Hills kan sa pynlong biang da ki jingiakhih bad shim da ki sienjam kiba tyngeh ia kino kino ki company kiba shim kabu ia ka Meghalaya Commercial Truck Owner Driver Association na Jaintia Hills.
