U MDC ka Saphai-Sahsniang u ma Rikut N. Parien hadien bala ïoh shibun ki jingujor na kiba bun ki khun samla bad kumjuh na ki kmie ki kpa kiba shem jingeh ban ïoh ïaka ‘Domicile Certificate’ naka bynta ka jingpynkhreh ban ïakhuh ïa ka kam Shipai (BSF) bad kiwei de.
Mynta ka sngi Thohdieng utei u MDC ula leit ban ïakynduh ïa u Deputy Commissioner ka West Jaiñtia Hills u Abhinav Kumar Singh, IAS ha ophis treikam jong u ban pynsngew ïa kane ka jingeh jong ki khun samla ka Ri-Lum Jaiñtia kiba hap ban ap da ki bun bun kynta.
Utei u MDC haka jingkren bad u DC ula kular ban pynkloi katba lah ïa kane ka kam da kaba kular ban pynbun noh ïa ki nongtrei khnang ban kloi kane ka kam, ula kular ruh ban pynïoh ïa ka Domicile Certificate sha baroh ki nongapply hashaw ka 5 tarik jong une u bnai ban wan.
Shuh shuh naka liang u DC ula bynrap da kaba ong nangne shakhmat ka ophis DC kan pyrshang katba lah ban pynbha ïa ka rukom treikam khnang ban suk ki paidbah babun balang, da kaba ai jingtip sha ki nongshong shnong khamtam ïaki samla ban kin tip kumno ban apply online ha kaba ïadei bad ki kot ki sla ba donkam haka por ba wad kam.
Haka juh ka por u ma Rikut ula buh ka jingkyrpad ïa baroh ki khun samla shynrang bad kynthei ba kin long kiba ïaishah bad kim dei ban sngewkhuslai eiei, kum ki samla ki dei ban long beit kiba la pynkhreh ba ka bynta ka kam. Ula kitbok kumjuh ïa ki baroh ki samla kiba ïakhun ïa kane ka kam shipai (BSF) ban kin ïoh ïaki kam ki jam jong ki na ka bynta ban ai jingïada ïa ka Ri.
