Hynne ka sngi ka 17 Nohprah 2024, u Myntri ka tnad Home Police ka Jylla, u Bah Prestone Tynsong, u la ioh ia ka lad ban pynshai sha ki lad pathai khubor ban pyntikna ba na ka liang ka tnad Border Security Force (BSF) ka la long kaba Peitngor ha kaba iadei ban tehlakam ia ka jingwan rungtuh ki nong Bangladesh, sha ka Jylla lane ka jingwan hiar ki kor ba her na suiñ (Drone) ka Bangladesh.
Lah ban kdew hangne ba dangshen la iohi ia ka jingwan her ki drone ka Bangladeshi Bayraktar TB2 Unmanned Aerial Vehicle (UAV) ha khappud ka thaiñ Sohra bad Shella, East Khasi Hills District kaba long kumba 200 meter shathie jong u zero line.
Haba kren bad u Bah Prestone u la ong “ki tnad shipai BSF ki la shimkhia bha ban Peitngor halor ka jingpyrshang ban rungtuh ki briew na Bangladesh ne halor ka jingpynhiar Drone da ka Bangladesh kaba la poi haduh Sohra”,
“Hakaba iadei bad ka Sorkar Jylla ha kum kine ki jingjia, ka Sorkar Jylla bad ka Sorkar pdeng ka long kaba Peitngor bha khnang ban pynthikna ba kan don ka jingshong shngaiñ ha ka Jylla , bad ka Ri baroh kawei” u la bynrap .
Ban pyntikna ia ka jingtreikam ki BSF bad ka sorkar, u Symbud Myntri Rangbah u la ai mynsiem da kaba ong, “kumba ka long mynta hi, ka Jylla ka don hapdeng ka shongsuk shong shngaiñ, kumta ym dei ban tieng”.