Ka jingleh shiliangkhmat jong ki nongpyniaid jong ka North East Olympic Games (NEOG) 2022 ia ki lad pathai khubor jong ka jylla kala wanrah ka jingsngewpyrshah kaba jur na ka liang jong ka Meghalaya Editors’ and Publishers’ Association (MEPA) kaba dei ka seng kaba peit ia ka bha ka miat jong ki khubor hapoh ka jylla bad kat haduh ba kala btah ia baroh ki lad pathai khubor ban sangeh noh ka jingpynmih khubor ia kane ka jingialehkai kaba la pynlong hapoh ka jylla.
Kane kala jia halor ka rukom sam ia ki Advertisement, ha kaba ki nongpyniaid jong ka NEOG 2022 kila ai shiliang tang ia ki katto katne ki kot khubor nalor kata kila pynioh sha ki lad pathai khubor kiba na shabar jylla bad leh klet noh ia kiba napoh ka jylla.
Kane ka jingleh jong kine ki nongpyniaid ka long ruh pyrshah ia ka polisi treikam jong ka tnat pathai khubor ha ka jingshisha la dei ban sam nyngkong sha ki lad pathai khubor kiba dei trai ri ne napoh jylla bad hadien kata lah ruh ban ai sha kiwei de.
Kumta ka MEPA kala bthah bad kyntu ia ka jingiatreilang jong baroh ki lad pathai khubor ba kynthup naduh ki Print, Electronic bad ki Online News Portal ban sangeh noh ka jingpynmih ia ki khubor, ki dur ne kiwei ki jingpyntip kiba iadei bad kane ka North East Games 2022 ka ban treikam noh naduh mynta ka sngi tad haduh ban da pynbna da kumwei pat.