Ki nongialam jong ki Sengbhalang bad ki nongshong shnong jong ki Saw Shnong hapoh ka lama jong Welfare Organisation kila pynpaw ia ka jingiai pyrshah jong ki halor ka jingwan theh ñiut ka Jowai Municipal Board (JMB) ha ka shnong Thadmusem kaba dei hapoh ka jingkhmih jong ki saw shnong hapoh ka Elaka Nartiang.
Kane ka jingpyrshah kala paw biang tang na ka daw ka jinglehsting jong ka JMB ban pynbiang kat kum ki jingdawa jong ki paidbah katei ka thaiñ kaba dei ban kut haduh ka 5 tarik mynta u bnai.
Ki nongialam jong katei ka Welfare Organisation kila ong ba lada ka sorkar lyngba ka tnad JMB kala pyndep ia ki jingdawa jong ki paidbah kata ban pynbiang shwa ia ki jingdonkam jong kane ka jaka theh ñiut kumba ka dei ban long, kane ka jingpyrshah ka lah ban duh noh, hynrei kumba long haduh mynta ka sorkar kam shym la leh ei ei ia kaba la iakut kumta ki paidbah ki dang bteng ia kane ka jingpyrshah jong ki ban pynbor ia ka sorkar ban leh ia kaba donkam. Lada ka sorkar kam lah ban leh katkum ka jingdawa ki nongialam jong ka Welfare Organisation ki ong ba ka sorkar ka dei ban klet noh ia katei ka jaka.
