Ba lynshop ka Eriong Fengal yn khang ki kad liengsuiñ bad ki skul ha Tamil Nadu

U slap uba dang bteng ryngkat ka  jinglynshop jong ka eriong Fengal ia ki bynta jong ka Tamil Nadu bad Puducherry haduh mynta ka sngi, ka sorkar jylla jong ka Tamil Nadu kala hap ban pynsangeh noh ia ki liengsuin ha kad liengsuin ha Chennai haduh ka por 7 baje mynmiet mynta ka sngi. Ka eriong Fengal kaba her halor ka Bay of Bengal, ka lah ban hiar khyndew ha Puducherry mynta ka janmiet, ong ka tnat peit mariang jong ka Ri India (Indian Meteorological Department).

Ha kaba iadei bad kane ka sorkar Tamil Nadu, ka la pynbna shuti ia baroh ki jaka pule ha ka jylla bad la kyntu ia ki kompeni IT, ba kin ailad ia ki nongtrei, ba kin trei na la ïing. Ki kali paidbah kin dang sahteng mynta ka sngi mynstep ha surok East Coast bad ha surok Old Mahabalipuram. U Myntri Rangbah ka Tamil Nadu, u MK Stalin, u la bishar bniah ia ka jingpynkhreh ia ka eriong ha ka control room ha Chennai mynta ka sngi bad la bthah ia ki nongshong shnong ban long kiba husiar bha ialade bad ban kiar na ka jingmih shabar ne leit sha ki rud duriaw.

Na ka liang ki kynhun ai jingïarap ki la pynkhreh bha ialade ban ai ka jingiarap sha ki lanot ha kano kano ka por. Haduh 471 ngut ki briew kiba dei na ki 164 tylli ki longïing la hap ban pynkynriah sha ki hynriew tylli ki jaka ai jingïarap ha ki Distrik Tiruvallur bad Nagapattinam. Lada jia kano kano ka jingjia kaba sngewsih, la pynkhreh ia ki lieng, ki generator, ki motor pump bad ki tiar kiba donkam bad la pyntreikam ia ki kynhun ai jingiarap jong ki NDRF, ha ki jaka ba don jingma la ong ka khubor sorkar.