Jowai: Ka jingpynioh NOC lymmuh da ka Jaiñtia Hills Autonomous District Council (JHADC) sha ki Coke Factory khlem ka jingiasyllok lang bad ki paidbah ne ki shnong kiba marjan ba don kine ki factory kala pynlong ia ka Nongkhlieh Area Socio and Cultural Development (NASCD) ban leit buh da ka jingujor ha katei ka ophis.
Mynta ka sngi kane ka seng hapoh ka jingialam jong u Chairman u bah Embok Pajuh bad u Secretary u bah Embhah Sukhlain ki la leit ban ujor pyrshah ha khmat u CEM ka Jaiñtia Hills Autonomous District Council bad ha u Chief Forest Officer ka Jaiñtia Hills Autonomous District Council halor ka jingai NOC ia ki Factory Coke hapoh ka Elaka Nongkhlieh khlem da tip lang ki para marjan shnong.
Na ka liang jong ka seng ka la pynpaw ba kan ieng ban pyrshah jur halor katei ka kam bad kan ym pdiang da lei lei ruh ia ka jingai NOC da kaba ai Recommendation da u Dolloi ka Elaka Nongkhlieh. Ka seng ka ong ba wat ki Factory Coke kiba don hapoh ka Elaka Sutnga kiba don marjan pud bad ka Elaka Nongkhlieh ruh ki don shibun ki shnong ki ba shah ktah halor ka jingdon jong kitei ki Factory Coke katno tam ka jingshah ktah kan long lada ki Factory ki don hapoh ka Elaka, kaba lah ban ktah ia ka koit ka khiah bad ia ki jingthung jingtep jong ki nongshong shnong. Ki katto katne ki shnong kiba lah ban shah ktah na kine ki Coke Factory ki kynthup ia ka shnong Tongseng, Shnongrim, Khaidong, Shnong Thymme, Shnong Lumbangla bad kiwei de ki shnong ba don marjan