Ka Federation of Khasi Jaiñtia & Garo People (FKJGP) War Jaiñtia Circle mynta ka sngi ba ar 11 tarik kala leit ban aiti daka dorkhas ha u Executive Engineer PWD (Roads) Jowai South Division, West Jaiñtia Hills District da ka jingkyrpad jur ban pyndep noh ka jingpyntrei ïa ar tylli ki surok kiba don hapoh thaiñ War Jaiñtia, Amlarem.
Kine ki ar tylli ki surok kiba ka seng kala angnud eh ban pyndep na ka bynta ka jingmyntoi ki paidbah ki long, u surok Kudengrim haduh Kudengthymmai uba la sangeh ka jingpyntrei bad kumjuh ïa u surok Amlarem haduh Nongbareh ba la donkam ban shna pynheh noh ïa u katkum ka jingdawa jong ka por.
Kumba long mynta ki nongshong shnong kiba im ha katei ka thaiñ lyngba kitei ki ar tylli ki surok ki ïakynduh shibun ki jingeh khamtam haka leit ka wan namar ka jingsniew shaba palat jong ka surok, shuh shuh kiba bun na ki nongshong shnong na katei ka thaiñ ki im da ka rep ka riang bad ki shem jingeh ban pynpoi ïaki mar ki mata.
Ha kaba ïadei bad u surok Kudengrim haduh Kudengthymmai ka seng kala ujor ha u EE kumba long mynta ïa utei u surok la sangeh noh ka jingpyntrei ïa u da u Contractor ma Khlur Pakma, ïa uba ka sorkar kala dep sanction haduh 17.6 klur tam ban pyntrei, katkum ka jingtip jong ka seng la sdang pyntrei ïa u haka 6 tarik u June, 2022 da ka jingthmu ban pyndep ha u snem 2025 jong u bnai June.
Ha kaba ïadei bad u surok Amlarem haduh Nongbareh, ka FKJGP War Jaiñtia Circle kala kyntu na u EE ba dei ban pynshna maramot noh ïa u surok uba don ka jingjngai kaba 21 kilomiter eiei namar utei u surok u long shisha u budlum jong ka roi ka par jong ka War West Shilliang Amkshar.
Ka seng haka jingleit jurip ha ka 3 tarik u June 2024 kala lap shisha ïa ka jingsniew shaba palat jong u surok bad ki thliew ki syar ba bun, wat tang ka rong u surok ym ïohi shuh la paw satang da ki maw khohruh khohram.
La pynsngew ruh lyngba une u surok ki don da ki spah tylli ki kali kiba ïaid ba ïeng manla ka sngi, kumta kane kala pynlong ïa ka seng ban dawa pynheh noh ïa une u surok khnang ban lait na ka jingkhapngiah.
U President ka seng bah Bahshlur Mukhim ula ong hadien ka jingïakynduh bad u EE ka seng kala ïoh jingshai ha kaba ïadei bad u surok Kudengrim haduh Kudeng Thymmai, na ka por sha ka por u EE ula dep ban pynkynmaw bunsien ïa u Contractor hynrei u Contractor u khlem pyntrei shuh ïa ka kam. Na ka liang ka seng kala kular ban buddien ïa kane da kaba kyntu ïa u Contractor ban shimkhia mardor ïa kane ka kam naduh bala mih kane ka khubor.
Halor ka jingsniew u surok Amlarem haduh Nongbareh u bah Bahshlur Mukhim ula ong ïa utei u surok la shu ieh sah khlem don kino kino ki jingmaramot, da kaba kyntu ïa u MLA ka thaiñ ma Lahkmen Rymbui ba un ïarap lem ban pynshna ïa u surok. Namar na katei ka thaiñ kila mih shibun eh ki riew pawkhmat bad kala dei ka por ban don noh ïa u surok uba biang. Une u surok u pynïasoh naduh ka shnong Amlarem, Amshipai, Shia hyiang, Pamtadong, Ammutong Padu Mawsku, Padu Bah, Padu Mawjyllang, Mawngap, Khonglah Nongbareh rim, Nongbareh Lyntiar, Kudeng bad ka shnong Amkoi.
