Ka jingsañium bad ka jinglong khohruh khohram ki lynti ïaid kjat (Foodpath) kiba don ha shilynter u NH-6 ha hap hapoh East Jaiñtia kala wanrah ïa ka jingeh ba khraw ïa ki paidbah nongleit nongwan. Ha kaba ïa dei bad kane na ka liang ka Jaiñtia Students Movement (JSM), Eastern Region hynnin ka sngi ka la leit ban buh da ka jingthoh hakhmat u Deputy Commissioner ka East Jaiñtia Hills District ha kaba ka la pynpaw ka jingsngew khia halor ka jingbym bit bym biang, ka jingbym khuid ki lynti iaid kjat kiba naduh Tuber Sohshrieh ter ter shaduh Ratacherra, ha kaba ka seng ka kyntu ban da pynkhuid bha ruh ïa ki jaboh, ki jakhlia, ki ñiut ha ki lynti iaid kjat khnang ban pynsuk ïa ki briew kiba ïaid kjat.
Katkum ka shithi ba la soi da u President JSM-ER, u bah Wellson RD Siangshai bad u Vice President, u bah Donkupar Roy Kharkrang, la pynpaw kumba long mynta ki jaka iaid kjat ne ki footpath ha shi lynter ha surok National Highway ha East Jaiñtia Hills District khamtam ha Wapungskur, ha Mookhep, Ladrymbai bad ha kiwei kiwei ki jaka, ki la dap da ki jaboh, ki jakhlia, ki ñiut bad khamtam eh ha Wapung (Moopynieiñ) bad ha ïew Ladrymbai la i donkam ban pynkhuid kloi khnang ba ki briew kin ioh ban iaid na kine ki lynti iaid kjat ban nym buh jingma ïa kiba iaid ba ieng bad kine ki lynti iaid kjat ki ju iaid bha ki khynnah skul, ki paidbah ruh kumjuh.
Halor kane, na ka liang ka seng ka kyrpad ïa u Deputy Commissioner ba un bthah ïa ka NHAI ba kan shim khia noh mardor ban pynkhuid bha ïa ki lynti iaid kjat bad ong ruh ba da ka jingtuklar lang u Deputy Commissioner kan wanrah jingmyntoi ïa ki paidbah ha ki shnong ki thaw bad kin ioh ban iaid lynti na ki lynti iaid kjat bad lait na kiba bun ki jingma jingmynsaw.
