Ka Seng Jaiñtia Students’ Movement (JSM) Eastern Region bad Southern Region ha ryngkat ka jingsynran lang ki nongialam na ka Sengkmie mynta ka sngi ki la leit ban tuklar ia kawei ka kharkhana pynmih Cement ka JUD Cement Factory ba don ha Wahiajer, East Jaiñtia Hills.
Ia kane ka kam ka seng kala hap ban shikhia ka dei hadien ba ka la ioh ia ki ba bun ki jingujor na ki trai shnong ki ba trei bylla ha katei ka kharkhana ki ia kynduh shibun ki jingeh, naduh ka jingbymsiew tikna ia ka tulop lane ka Bainong sngi jong ka ba la sahteng mynta haduh 3bnai. Nalor kata jingbym lah jong katei ka karkhana ban pynbiang ka jaka sah, ka umbam umdih bad ka jingshah iuhroit, bad leh shiliang ia ki Nongtrei trai jylla (Local) jongngi ha ki bor pyniaid jong katei ka Company.
Mynta ka sngi ka Seng ha ka jingiakren bad ki bor pyniaid ka la ai por hapoh shibnai ia katei ka Company ba ka dei ban siew ia ki tulop jong ki Nongtrei jong ka bad ban pynbun da ki briew trai jylla, namar ka seng ka ong ba ki dang don shibun ki Samla jong ka jyllla kiba la nang la stad hynrei ki bym iohkam iohjam lym da kumta kam ka seng kam banse ban leit khang tala shisyndon ia katei ka Company.
Ka Seng ka la maham ruh ba ka company ka dei ban pynbiang ia ki kot ki sla jong ki Nongtrei jong ka kiba wan na bar Jylla kum ka Labour License bad Trading License.
