Kawei ka longkmie kaba la lai ngut ki khun ba tip kyrteng ka Jennifer Chyrmang kaba shong ba sah ha Khliehriat West, EJHD kam banse shuh ban leit pan jingiarap na ka seng FKJGP Khliehriat Circle kumjuh ruh na ka tnat One Stop Center jong ka tnad sorkar Social Welfare, Khliehriat namar ka jingshah ieh beiñ jong ka ha la u jong u lok.
Katei ka longkmie kala iathuh ba u lok jong ka uba kyrteng u Kobin Nongtdu uba shong ba sah ha ka shnong Byndihati, u la ieh bein ieh khoh ia ka lem bad lai ngut ki ki khun khlem da ai shuh kano kano ka jingiarap, nalor ba ka long ka riew kynthei kaba duk ba rangli, nalor ba kam lah shuh ban leit trei bylla namar ka jingshitom jong ka met na ka daw ka jingshah sumar ha ka por ba kha ia baroh kitei ki khun.
Kumba long haduh mynta kane ka longkmie ka dang iai ap ia une u lok jong ka ba un wan ai jingbam jingdih bad ki jingiarap ia ka longiing hynrei haduh mynta la kumba phra bnai utei u rangbah u khlem wan ïing shuh. Na kane ka daw kane ka longkmie ka la ong ba ka don hapdeng ki jingeh kiba khraw ha ka ban pyndap pynbiang ia ki jingdonkam jong ki khun bad kiwei de ki jingdonkam ha iing ha sem.
Ka kong Jennifer kala iathuh ba kumba long mynta ka dang ioh jingkyrshan tang na ka seng FKJGP Khliehriat Circle kaba ka la pan ka jingiarap bad ka kyntu ruh ia ki bor ba dei peit jong ka Social Welfare ba kin leh kloi ia ka kam kat kum ki jingujor jong ka sha kane ka tnat treikam jong ka sorkar.
Na ka liang ki nongialam ka FKJGP Khliehriat Circle kiba la don lang hynne ka sng ki la ong ba “Ngi na ka liang ka seng FKJGP Khliehriat Circle hadien ba ngi la ioh jingpyntip na kane ka longkmie ha ka jingiadei bad ka jingshah lehbein jong kane ka longkmie hala u lok, mar mar ngi la iarap ban buh ia ka jingujor ha ka Social Welfare One Stop Centre, ha ka jingiadei bad kane ka jingjia, ngi ai khublei ia ka One Stop Centre namar ba ka jingkit khia jong jong ka halor katei ka kam, namar kumba long mynta kane ka tnat treikam kala shimkhia ia kam wat haduh ban pynpoi ia kane ka jingtip sha ki bor jong ka Court” la ong ki nongialam ka FKJGP.
Ki nongialam jong ka seng kiba la synrang lang ia ka kong Jennifer ki kynthup ia u Vice President bah Wanki Lyngdoh, General Secretary Fulmoon Nongtdu bad kiwei kila ong ruh, ba naka liang jong ka seng kala iarap ia kane ka longkmie haba iadei bad ka pisa pilain kat kaba ki lah bad ki kyrpad ruh ia kiwei ki para sengbhalang ne nongialam bapher bapher ban iarap lem ia kane ka longkmie kaba shem lanot shem jynjar namarba kane ka longkmie kam lah shuh ban trei ban ktah namar ka jingbym shah ka bor met. Ha ka juh ka por ka Seng ka kyrpad ruh ia ka Court ba donburom ban pyndep kloi iaka Case jong kane ka longkmie khnang ba kan ioh jingiarap kloi katkum ka hok long briew man briew jong ka.
Ka seng ka maham ruh ia kiwei pat ki longkpa kiba shait mlien ban ieh bein bad pynjot iaki khynnah kynthei jong ka jaitbriew ba kim dei ban leh ia kum kane ka jait kam nangne sha khmat.