Ka Khasi Students’ Union (KSU) War-Jaiñtia Circle ha ka jingïalam u Asst. General Secretary samla Mechanki Syngkon, Organising Secretary samla Block Tariang bad kiwei de kila leit ban buh dorkhas ha ophis SDO (C) Amlarem hadien ba ki paidbah ka thaiñ kila wan pynsngew sha ki Nongïalam jong ka seng halor ka jingshah ktah ki Tyllong Umdih na ka daw ka jingwan tuid ki jaboh kiba mih na ki Dewïong kiba lah ieh da ki bun bun snem ha ki jaka ba pyllang ïa ki.
Kumta ka KSU War Jaiñtia Circle, ka la leit ban pynsngew ïa kane ka jingma kaba ap ïa ka koit ka khiah jong ki nongshong Shnong ha ka SDO (C) Amlarem ban phah tuklar halor ki jingbuh pathar ïa ki dewïong kiba ieh la slem ha kiba bun ki jaka bad ruh kiba la buh ha ki bynta jong u Surok Amlarem – Dawki.
Na ka daw ka jinghap u slap khamtam ha kum kane ka aiom slap ka um ba tuid na kine ki dewïong ka la ktah ïa kiba bun ki umbam umdih kumjuh ruh ïa ki jingthung jingtep.
Ka KSU ruh ka kyntuh ïa ka SDO ban bthah ïa ki trai jaka bad ki trai dewïong ban weng noh bad ban buh ha ki jaka kaba biang, khnang ba kan ym ktah ïa ka khoit ka khiah ki nongshong shnong ka Thaiñ.