Na ka jingmih ka jingshah khanglad ki dkhot sengbhalang bad ka jingshah ktah kti ki Longkmie, ki bym shym la shah ban rung sha ka jaka ba pynlong ia ka Public Hearing ha ki bor VDP bad ki Shnong jong Wahiajer Narpuh, East Jaiñtia Hill District, ba la pynlong da ka Meghalaya state Pollution Control halor ka jingkwah ka MS Megha top Cement Private Limited ban shna ia ka khar khana pynmih dew bilat myn ha ka 18 Tarik u Risaw.
Na ka liang ka Hynniewtrep Integrated Territorial Organisation (HITO) Seng Kmie hapoh ka jingialam jong u President u bah Donbok Dkhar ka la leit ban buh da ka jing ujor ha ki lai tylli ki Ophis jong ka Jylla ka Meghalaya Human Right Commission, ka Office jong ka DGP jong ka Jylla, bad ha u Chief Secretary jong ka jylla.
Haba kren sha ki ladpathai khubor u President jong ka seng u bah Donbok Dkhar u la ong ba ka jingujor sha ka Meghalaya Human Right Commission ka dei namar ba ki don ki Longkmie kiba shah ktah kti ha ki VDP bad ki bor shnong, kiba la fail ban treikam, namar kum ba ka long ka Public Hearing ka shah ia ki ban sngap ia kaei kaba mih, hynrei ki la shah khnang tang ia ki ba kyrshan.
Ka jingujor ha ka DGP jong ka Jylla bad Chief Secretary ka dei halor ka jing bym lah treikam jong u Deputy Commissioner jong ka tei ka District bad SP jong ka tei ka District, bad dawa na kitei ki bor ban pynshitom ia kitei ki khlieh nongshynshar jong ka tei ka District.
Shuh shuh ha ka jing kren utei u nongialam sengbhalang u la ong ba ki briew kiba la wan sha katei ka Public Hearing kiba la ioh rung bad ai jing kyrshan ki dei ki bym dei satia ki trai shnong hynrei ki dei kiba nabar.
