Mynta ka sngi ki nongïalam ka Bouncers Association of Meghalaya Jaiñtia Hills (BAM-JH) kila leit ban ujor da ka Ejahar (FIR) ha u Officer Incharge ka Jowai Police Station, halor ka jingshah maham bad shah byrngem ki lai ngut ki dkhot ka seng lyngba kawei ka rynsan Social Media (Instagram) kaba ym shem la lah satia ban ithuh ia ka jinglong trai jong ka (Fake Account).
Hadien kane ka jingshah maham jong ki dkhot ka seng, na ka liang ka BAM-JH kam shem la shim sting ia kane ka kam hynrei kala mih shakhmat ban leit ujor syndon sha ki pulit jong ka Jowai Police Station ba kin ïoh leh ïa kaba donkam, khnang ba kum kine ki jingjia kin ym jia shuh nangne shakhmat.
Katkum ka ejahar la ïathuh ba kine ki jingjia shah maham ki para dkhot jong ka BAM-JH kala paw ha ka 14 tarik mynta u bnai ha ka por 8:36 pm, ha kaba la don ki katto katne ngut kiba kwah ban shim kabu ïa kane da kaba maham ïa ki dkhot ka seng da ki ktien sniew ba lai phew jait.
Halor kane ka seng kala buh ka jingkyrpad ïa ka tnad pulit ba kan shimkhia mardor ïa kane da kaba thwet jur ïa kitei ki briew kiba don bynta ban kren ïa ki ktien sniew sha ki para dkhot jong ka BAM-JH. La pynpaw ba kane ka jingkynthoh bad ka jingshim kabu jong ki katto katne ngut kala ktah shikatdei eh ïa ka long rynïeng jong ki para dkhot bad kumjuh ïa ka imlang ka sahlang.