(Representational image)
Ka Sub-Divisional Magistrate jong ka Pynursla Civil Sub-Division ka kong E.L. Warjri, MCS, ha ka 10 tarik mynta u bnai kala pynmih ne pyntreikam iaka hukum katkum ka kyndon 163 BNSS, na ka bynta ban iada na ka jingshah pynjaboh palat ki um ki wah ha ki thaiñ Pynursla.
Katkum ka hukum sorkar bala phah mynta ka sngi (15/12/2025) la iathuh ba ka Sub-Divisional Magistrate jong ka Pynursla Sub-Division, Pynursla kala ioh shibun ki jingmudui na ki paidbah, ki Dorbar Shnong bad ruh na ki ophisar kiba la leit jurip ia kiba bun ki wah hapoh ka thaiñ Pynursla, ba ki long kiba jaboh bad kiba lah ban ktah ia ka koit ka khiah jong ki briew bad kumjuh kaba ktah ia ki dohum dohwah.
La iathuh ba kane ka jingjaboh jong ki um ki wah ka dei na ka daw jong ka jingpyntuid jaboh sha ki wahduid, ki liar kaba kit ia ki jaboh sha ki wahbah. Nalor ki jaboh ka jingpynlang ia ki jakhliah ba kynthup lang ia ki plastic bad ki khyndew harud wah, ka jingsait kali bad kiwei de ki rukom pynjaboh.
Kumta ha ka 10/12/2025 ka kong Warjri Sub-Divisional Magistrate kala pynmih ia ka hukum katkum ka kyndon 163 BNSS ban khang pyrshah ia kino kino ki riew shimet, ne ki company ba kim dei ban pyntuid ia kino kino ki jait jaboh sha ki wah. La khang pyrshah ruh ban sait kali ne sait jaiñ ha ki wah ban pyndonkam paidbah.
Kane ka hukum kan treikam shisyndon naduh ka sngi ba la pynmih ia ka.
