Ka Jaiñtia National Council (JNC) Employment Commision mynta ka Sngi ka 7 tarik May 2025 ha ka jingleit buddien jong ka halor ka jingshah pynduh kam ki khyndai ngut ki pulit home guards Power Grid Khliehriat ha kane ka taiew bala dep ka seng ka la leit ban iakynduh markhmat bad u Chief Manager jong katei ka tnad, ha Khliehriat bad haka jingiakren bad u, u la pyntip hakhmat ka seng bala pynjlan noh iaka jingtreikam jong ki sha ka lai bnai.
Ka seng hapoh ka jingialam u President rangbah ka JNC u bah Sambormi Lyngdoh ha ka kyrwoh u la ong ba ka seng ka sngewnguh ia ka Powergrid Khliehriat halor ka jingshimkhia ka jong ka ban sngap iaka sur ka seng ban pynneh biang ia kine ki home guards bala shah weng kam bad la kyrpad ruh iaka ban thaw ki lad ki lynti ban aikam aijam khamtam ia ki trai Ri trai muluk, “Namar lada phim lah ban aikam iaki trai ri kan myntoi aiu ba phin don hangne ha ri jong ngi” la ong u ma Sambormi.
U President ka JNC lyngba u kyrwoh ula kyntu jur ruh ia u District Commandant ka home guards ba hapoh kine ki lai bnai ka jingpynjlan iaka jingtrei kine ki paradoh parasnam jong ngi ban wad ki lad ki lynti naka bynta ban pynbha pynmiat iaka rukom treikam ki home guards. Shuh shuh u President ula kyntu jur ruh iaka sorkar jylla ba kan shimkhia halor kane ka bynta khamtam ha kaba iadei bad ka jingkyrduh kam jong ki trai ri trai muluk khnang ba kane kan nym jia shuh nangne shakhmat.
Naka liang ka JNC kan nym shong kli kti bad kan sa shong pyrkhat ha kine ki khyndiat sngi ban wad ki lad ki lynti ha kaba iadei bad ka jingioh kam ioh jam ki paradoh parasnam kiba trei kum ki home guards. La pynpaw ruh ba khamtam ha East Jaiñtia Hills ki don shibun ki karkhana dewbilat bad karkhana dewiong (Coke) ne kino kino ki private company kiba lah ban aikam aijam iaki briew jong ngi haka kam home guards bad ia kane ka seng kan sa wad ki lad ki lynti ha ki bor barit jong ka naka bynta ban myntoi iaki khun samla wad kam khamtam ha kane ka juk kyrduh kam.