U Bah Adelbert Nongrum, MLA ka North Shillong Constituency u la leit da lade sha Lumdiengjri Police Station, Shillong na ka bynta ban ai khublei bad ai mynsiem ia ki Pulit kiba la shimkhia ban tih bad wad jingtip halor ka jingioh khubor ba kynnoh shah dung injek ka samla ha kiba la suba ba dei ki nongdih drok.
Ha katei ka jingleit ban ai mynsiem ia ki Pulit, u Bah Adelbert u la ai ruh ia ka song Pisa kaba 10,000 tyngka sha ka Officer Incharge Kong Tariang, kum ka dak ban ai khublei bad ban pyndep ruh ia ka kular ha kane ka taiew ba lah dep, kata ba kino kino kiba ai jingtip kaba tikna halor katei ka jingjia, na ka liang kum u nongmihkhmat un ai ia ka song pisa kaba 10,000 bad 20,000 sha kiba ioh kem ia ki runar.
Haba ioh ban iakren bad u Bah Adelbert, u la ai ka jingiaroh ia ka jingsted treikam jong ki Pulit ban pyntikna halor katei ka khubor kaba shukor kaba la pynsyier ruh ia ki paidbah khamtam ia ki khynnah skul. “Ka dei ka kamram jong nga ban ai ka buskit ia kiba ai jingtip bad iohkem. Nga wan ban ai mynsiem bad pyndep ia ka kular ba ka Police Station kan nang lah ban trei shitom”.
U Bah Nongrum u la pyntina ruh ba un lum ia ka jingialang bad ki shnong hapoh ka Konstitwensi na ka bynta ban thaw ki lad ki lynti bad ban pyntikna ba yn rat dyngkhong ia ki jingsniew khamtam ia ka jingkynrei jong kiba dih drok.
