Uwei u diengbah ba don ha Tpep jong ka kur Soo Kpoh Khad-ar Wrnai ha Iongpiah, Jowai ula khyllem hynne ka shiteng synñia na ka daw jong ka jingjur palat ka jingsyllad jong ka lyer.
Kane ka jingkhyllem jong une u diengbah ula leit ban sha ki bynta jong ka surok bah hajan jong ka ïing San Mala, ha Iongpiah Jowai. Ha kane ka jingjia bun na ki tyllai bording elektrik kila shah ban bad kila dkut, kynthup ia ki tyllai telephone bad ki tyllai cable jong ki TV Network ruh kila dkut lang. Ki tnad jong une u dieng bah kila kah lynti mar shiteng ia u surok bah, ha kaba ki kali ba iaid ba ieng ki la hap ban iaid tang shiteng u suruk haba la poi ha kane ka jaka, nalor ka jingpynwit jingpynthut jong kitei ki tyllai bording kiba la pynsyier mynsiem ruh ia ki briew, wat la na ka liang ka MeSEB kala dep ban pynduh ia ka bor ding sha kitei ki jaka.
Katkum ka jingiathuh jong ki trai ïing kiba shong mar jan bad kane ka jingjia kila iathuh ba kane ka jingjia jong ka jingkyllem jong utei u dieng bah kala jia ha ka por kumba 1:22 mynta shiteng synñia (17/4/2022). Ha kane ka jingjia donbok ba ym don ba mynsaw namar ka dei ha kapor shiteng synñia ban da dei ha ka por mynsngi mynshai te ka lah wan rah ia ka jingmynsaw jong ki nongleit nongwan.
Kat haduh ba thoh ia kane ka khubor ha ka por 10:30 AM ym pat don satia ki tnad sorkar kiba la wan ban weng ia utei u diengbah, kumjuh ruh na ka liang ka MeSEB ruh kam pat wan ban pyllait ia kitei ki tyllai bording kiba hap hapdeng surok bah.
Haba iakren bad ki katto katne ki nongshong shnong ka Iongpiah ki kwah ban kyntu ia ka tnad MeSEB ban wan pynbha noh kloi ia kitei ki tyllai bor ding namar ba kim pat ioh bor ding haduh mynta naduh ba jia kane ka jingkyllem une u dieng bah ha ka por shiteng synñia.
