Ka Synjuk Ki Khlieh Synshar Shnong Mawsynram C&RD Block mynta ka sngi ka 23 tarik Risaw 2025 ki la leit kynduh ia u Bah Prestone Tynsong Symbud Myntri Rangbah uba long ruh u Myntri ka tnad PWD ban pynsngew halor ka jingsniew ka surok Mawsynram na Weiloi sha Balat la bun tylli ki snem.
Ha kane ka jingleit kynduh la synran lang ïa ka Synjuk ki Khlieh Nongsynshar Shnong Mawsynram da u bah Olansing Suiñ, MLA ka thaiñ bad kumjuh u MDC u Bah Alvin Sawkmie.
Haba kren sha ki lad pathai khubor, na ka liang u Chairman ka Synjuk ki khlieh Synshar Shnong Mawsynram C & R D Block u Bah Hiamdor Rasang u la ong ba na ka jingsniew palat kane ka surok na Weiloi sha Balat ka la wanrah shibun ki jingeh ia ka leit ka wan ki paidbah.
Nalor kata u la pynpaw ba ka jingiakynduh bad u Symbud Myntri Rangbah ka long kaba sngewtynnad namar ia ka surok naduh Weiloi haduh Phlangwanbroi ka Sorkar ka la pynkhreh da ka intermediate road bad yn bei pisa lyngba ka world Bank.
Nalor kata u Chairman ka Synjuk u la pyntip ruh ba na ka liang ka Sorkar ka dang pynkhreh haba iadei bad ka surok na Phlangwanbroi shaduh Balat.
Khatduh, u la ong ba ka Synjuk ki Khlieh Synshar Shnong ka la pynsngew ruh haba iadei bad ka jingkieng Umpung, ba ka don ha ka jingbymshngiañ shuh. Katkum ka jingiathuh jong ki Engineer, ka jingkieng Umpung kam lah shuh ban shan. Ha kine ki sngi, ka jingiaid jong ki truck kiba kit palat pud ka jur bha. Ka Synjuk ki Khlieh Synshar Shnong Mawsynram ka la pynsngew ia kane bad na ka liang u Myntri ka tnad PWD u la kular ban shimkhia haba iadei bad kane ka jingkieng Umpung.
