Ka jingthud ba khah khah jong ki Mobile Network ba kynthup ia ka Jio bad Airtel ha ki thaiñ War Jaintia kala pynlong ia ki ar tylli ki sengbhalang kata ka HYC War Jaintia Circle bad ka War Jaintia Youths Organisation Shillong Unit ban dawa na ki nongpyniaid jong kane ka Company ha nongbah Shillong ban pynbha ia ka Network jong ki.
Kumta ha ka 21 tarik mynta u bnai kine ki ar tylli ki seng kila leit ban ia kynduh ia ki heh jong ki ar tylli ki Company ha nongbah Shillong kata ia ki nongpyniaid jong ka Jio bad ka Airtel na ka bynta ban ai da ka jngthoh bad dawa na ki ban pynbiang ia ki network na ka bynta ki nongshong shnong ka thaiñ War Jaiñtia baroh kawei.
Na ka liang jong ki nongpyniaid jong kine ki ar company kila pynshai sha kine ki seng ba ka daw jong ka jingthud ba khah khah jong ki Network ka dei na ka jingduh lait ba khah khah sha ka thaiñ War Jaiñtia. Ki ong bun na ki Tower Network dei kiba pyndonkam da ka bor ding lait bad haba jur ka jingduh lait kala buh jingeh ia ki Bateri ban shan slem.
Hynrei la katta ruh na ka liang jong ki nongialam jong kine ki ar seng kila ban jur ia kine ki company ba ki dei ban wad ki lad ki lynti ban pynbiang ia ka network jong ki, khnang ba kan ym wanrah ka jingduhnong kaba khraw ia ki nongshong shnong kiba shaniah ia ka network lyngba kine ki ar tylli ki company network.