“Ha District Council KHADC ym ju don Interbiw ne Eksamin”
U Bah Shemborlang Rynjah CEM KHADC u la pynmih ia ka hukum ban weng kam mardor ia ki 27 ngut ki nongtrei hapoh ka ophis KHADC, kata na ka kam Regular sha ka Casual na ka daw ba ki EC ba lah dep ki la thung kam sop sop lane pynrung kam khlem pynmih kot khubor bad pyndep lyngba ki eksamin bad interview.
Katei ka jingpynmih hukum kyndit kyndit jong ka Council ka la pynshaïong ia kitei ki 27 ngut kiba la trei bad im ja da ki snem lyngba ki kam bapher bapher kiba don ha katei ka ophis. Kitei ki 27 ngut ki la mih shakhmat bad pynpaw ruh ia ka jingpyrshah halor katei ka rai kaba kyrkieh jong ka EC ba thymmai hapoh ka jingialam jong ka Voice of the People’s Party (Party).
Katto katne napeng kitei ki 27 ngut ki la ong ba ki la trei ia katei ka kam palat 6 snem bad tang hapoh shisngi la ai ia ka shithi weng kam na ka kam ba la pynskhem ne Regularise sha ka kam bylla sngi ne casual “ngi kwah ba u CEM un shim ia kane ka rai ba ia kaei ba ngi la don mynta un hap ban pynneh bad ia kaei kaba ki kwah ban iaid nangne sha khmat katkum ki policy jong ki, ai kin iaid la ka jong, namar ngim iahap ia kane ka rai. Ha District Council ym ju don kata ka Interview ne da ka eksamin hynrei baroh la shu don ba pynthep dano re dano, kata kadei ka jingshisha. Baroh lah don kti lut hangne, Balei weng tang ia ngi??. Lada phi kwah ban weng, weng lut ia baroh.
Kitei ki 27 ngut ki kwah ruh ia ka jingpynshai na ka Council ban pyni na kaei ka nongrim ba ki pynmih ia kane ka hukum bad lada ka Council ka mad jingeh ha ka pisa tyngka ki donkam tang ka jingpynshai bad ki la pynpaw ba ki lah ban iaishah lada ki buh por ia ki ban pynap.
Katkum ka jingiathuh jong kitei ki nongtrei, la ong ba hadien ba ki la iakynduh ia u CEM, na ka liang jong u, u la kyntaid mardor ban pynrungkam biang ia ki bad kren shai ruh ba ym don jingkyrmen ban dang lah ban pyrkhat biang na ka bynta jong ki. Nalor kata, ki la iathuh ruh ba la don katto katne ba ka Council kala weng kam shi syndon na katei ka ophis khlem da ailad shuh ba kin trei wat kum ki nongbylla sngi ruh.