Ka Khasi Students Union Employment & Education Cell hapoh ka jingialam jong u Samla Reuben Najiar ha ka 14 tarik Rymphang 2025 ka la leit iakynduh ia u Vice Chancellor ka National Law University halor ka jingthung kam sop sop ia u Deputy Registrar bad kiwei kiwei ki post.
Na ka liang ka Khasi Student Union Employment & Education Cell hadien ka jingiakynduh ia u Vice Chancellor kam shym la seisoh namar ka daw ka dei ba um kwah ban pynshai iano iano ruh namar ka don ka Governing Council ha kaba don ki heh sorkar ki IAS officer bapher bapher kiba dei member bad lyngba ka jingdon jong ki, ka jingthung kam hapoh ka University la pyntip beit sha ki.
Kaba kham lyngngoh ka long ba ia ki kam ba lait hangtei la thung beit tang ia ki bahaiing bahasem ba don hapoh ka Governing Council bad ia ki briew jong u VC khlem kino kino ki advertisement ne jingthung kam kaba khuid.
Kane ka pynlong ia ka Seng ban mih noh na ka jingiakren namar kam shim sngew myntoi ban iakren namar um shim la lah ban jubab ia kino kino ki jingkylli kaba ka Seng ka buh ha khmat jong u.
Ka Seng ha kine ki sngi kan sa leit kynduh bad ka Sorkar namar kumba la tip ba katei ka University kadei ba la bei tyngka da ka Sorkar Jylla ban pynbeit halor kane ka bynta ba ka thungkam thungjam kan dei kaba khuid lym kumta ka Seng kan shim la ka jong ka sienjam.