Mynta ka Sngi ka KSU Jowai Unit kala ïoh ban ia kynduh ïa u Deputy Commissioner ka West Jaiñtia Hills District u A.K. Singh, IAS, ban pynsngew ïa ka jingeh ba don ha ka ophis District Commerce & Industries Centre, Jowai namar ha kane ka office kila don haduh 19 tylli kiba lait thylli khlem don nongtrei.
Ka KSU kala pynpaw ba dei na kane ka daw ba ka jingai jinghikai halor ka Carpentry kam don shuh ha kane ka Training centre.
Ha kane ka sngi la lamkhmat da u President ka Seng u Ewanmi phawa, ha ka jingïasynrang lang u General Secretary ka Seng u Nidapoi Shadap, u Seimon Dkhar Organising Secy Jowai Circle bad kiwei ki dkhot ka seng.
Ha kane ka jingïakynduh bad u DC ka Seng ka la ïoh ban pynsngew ba donkam ban pyllait advertisement kham kloi lyngba ka DSC khnang ba ka DIC kan lah biang ban ai ka jingshakri ïa ki khun samla jong ka District.
Na ka liang ka Seng ka pynpaw ruh ba ym tang ka office DIC kaba don ïa kane ka jingeh hynrei wat kiwei de ki tnat sorkar kiba don hapoh ka District ruh ki dkoh treikam namar bym biang shuh ki nongtrei (staffs). Kumta lada pynlong ïa ka jingpynrung kam lyngba ka DSC kan plie lad shibun ïa ki samla wad kam wad jam jong ka District.
Na ka liang jong u DC u la kular ban shimkhia ïa kane ka kam bad u la ong ym slem shuh kin sa pyllait noh ïa ka advertisement halor kine ki post ba lait thylli.
Na ka liang jong ka Seng ka pynpaw ba kan ïai buddien halor kane ka kam haduh ba kan da urlong. Kane ka long katkum ka jingpyllait khubor na u Publicity Secretary ka KSU Jowai Unit u Daohipaia Langstang.
