Wal la u District Magistrate ka West Jaintia ula dep ban pynmih ia ka hukum 144 CrPC mynta ka sngi (22.04.2022) hynrei na ka daw jong ka jingtlot palat ki bor jong ka aiñ kiba dei ban pyntreikam ia kane ka hukum, kumta la hap ban pynphai biang sha Jowai ia ki ñiut kiba ki trok kila dep ban kit ban leit breh sha ka jaka jong ka District Council.
Ia kitei ki ñiut kiba la pynphai biang sha Jowai ki truk ba kit ia ki, kila hap ban leit theh biang ia ki ha Lad Thomas Jones Synod College.
Katkum ka khubor bala iohlum la iathuh ba ki nongshong shnong jong ka shnong Khliehtyrshi hadien ba kila ioh jingtip ba ka sorkar ka thmu ban bret ia kitei ki jakhlia ha ki bynta jong ka shnong jong ki, kila iamih paidbah da ki spah ngut ban khang pyrshah ia kane, khlem da kheiñ snep ia ka hukum bala dep ban pynmih da ki bor pyniaid District.
Haba iakren bad uwei na ki rangbah na Jowai u bym kwah ban pynpaw kyrteng ula ong ba kane ka jia baroh dei na ka daw jong ka jingtlot palat ki bor jong ka aiñ, namar ba kim lah satia ban pyndonkam ia ka iktiar jong ka aiñ.
Kane ka kdew ia ka jingbymler jong ki nongsynshar District, khamtam ia u SP jong ka District wat hadien ba na ka liang jong u District Magistrate ula dep ban pynmih ia ka hukum 144 CrPC hynrei une u SP um lah satia ban pyntreikam ia ka katkum ba dei ka aiñ.
Une u rangbah ula kynthoh ruh balei ba hap ban leit bret ia ki ñiut ha ka por mynmieit myniong, ha ka jingshisha ka sorkar kala dei ban leit bret ha ka por mynsngi mynshai ha ryngkat ka jingsynran lang jong ki briew ka aiñ nalor ba ka sorkar ka la don ia la ka jong ka jaka.
