U Deputy Commissioner & Chairman District Disaster Management Authority (DDMA), East Jaiñtia Hills District ula pyntip ba la ioh ia ka kaiphot ba u Tower bor ding jong ka NETC No.152 uba kit ia ka bor ding ba 400 KV D/C Silchar-Byrnihat-Azara Transmission line ba don sha shnong Shymplong, u lah ban khyllem ha kano kano ka por na ka daw jong ka jingtwa khyndew ha ka jingpynheh ia u surok shnong ba la pyntrei da ka ophis PWD (Roads).
Kane ka jingtwa khyndew ka jia na ka jingther palat jong u lapbah ha kine ki khyndiat sngi bad ka jingtuid jong ka khyndew ka dang bteng haduh kine ki sngi ha ki bynta ba don utei u Tower bor ding.
Khnang ban ai ka jingiada na ka jingkhyllem jong u tei u tower bad kumjuh ban iada ia ka jingimbriew bad ka jingduh noh jong ki mar ha ki bynta ba mar jan bad une u tower na ka liang jong u DC ula bthah mar mar ia u Executive Engineer ka PWD (Rds), NEC Division, Khliehriat ban leh kloi ia kaba donkam.
Kumjuh ruh na ka liang jong u Deputy Commissioner & Chairman District Disaster Management Authority (DDMA), East Jaintia Hills District, katkum ka kyndon aiñ 34 (c) jong ka Disaster Management Act, 2005 u la kyntu ia ki paidbah ban phikir bha ialade da kaba kiar jngai na u ne u tower khnang ban lait na kino kino ki jingjia ba sngewsih, katba ki bor ba dei peit ki dang pynlong ka jingmaramot bad pynbit pynbiang ia kane ka jaka.
