Hadien ka jingioh jingtip ba ka don ka jingbret pathar ia ki ñiut bad jakhlia sha ki wah bad ki riat ha shi lynter ka lynti jong ka Mawlai By-Pass, kaba la wanrah ka jingma ia ka koit ka khiah jong u paidbah nongshong shnong ka thaiñ bad ka mei mariang kumta na ka liang jong ka District Magistrate (DM) ka East Khasi Hills District ka kong R.M. Kurbah, IAS kala pynmih da ka kyndon 163 jong ka BNSS 2023 ban khang pyrshah ia kane ka jingbret pathar.
Katkum kane ka kyndon la pyrshah ban bret pathar ia ki ñiut sha ki riat ne ki wah ha shi lynter ka lynti jong ka Mawlai By-pass bad la khang ruh ia ka jingpynmih bad ka jingpyntuid ia ki jakhlia na ki ïing ki sem ne ki dukan sha ki wah bad ki riat ha shi lynter ka Mawlai By pass.
Lada lap ia kino kino kiba pynkheiñ ia kane ka jingmaham, kin shah ban pynshitom kat kum ka Section 223 jong ka BNS bad kiwei ki wei ki kyndon.
Kane ka hukum ba la pynmih ha ka 18 tarik u Rymphang 2026 kan treikam noh mardor.
