“Bun ki tieng shuki, kin sa wan sha phi ha ka por Elekshon”
Ha ka jingmih paidbah hynne ka sngi hapoh ka jingialam jong ka kynhun Awakening India Movement (AIM) ha khmat jong u mot Kiang Nangbah, hajan Civil Hospital, Shillong, halor ka jingpynbor ka Sorkar ban pynrung kyrteng na ka bynta u Aadhar, u MLA ka North Shillong Bah Adelbert Nongrum u la wan ban ai ia ka jingkyrshan bad pynpaw ia ka jingpyrshah halor ka jingpynbor ka Sorkar ban pyndonkam ia u Aadhar na ka bynta ban ioh ia ki jingmyntoi bad ki skhim bapher bapher.
Haba ai jingkren ha kane ka sngi, u Bah Adelbert da ka jingbitar u la ther nyngkong ia ka Sorkar hapoh ka jingialam u Myntri Rangbah Conrad K. Sangma ba ki la pynbiej bad shukor ia ki paidbah ha kaba iadei bad ki jingmyntoi na u Aadhar. U la ong ba lada ka jingleh ia u Aadhar ka long kaba donkam beit ban leh (mandatory) balei kim kren ia kane ka ka por Elekshon, balei kim pynmih aiñ ba ki bym don Aadhar kim don hok ban ioh thep vote.
Lyngba katei ka rynsan, u Bah Nongrum u la shim ruh ia ka kabu ban pynrem ia ka Voice of the people’s party (VPP) kaba la beh shipor (suspend) ia u na ka seng.
U Bah Adelbert u la pyntikna ruh ba u dei u wei napdeng ki nongmihkhmat u bym pat leh ia u Aadhar bad u ba la kyntaid ia ka jingai injek ha ka por ba jur ka khlam Corona Virus. U la ong ba ka jingwan jong u kam dei na ka bynta jongno jongno hynrei namar u dei u shakri paidbah u wan kum u nongialam ban kyrshan ia ka jingshisha “Ngam don hangne ban pynshit paidbah hynrei nga don hangne ban ieng na ka bynta ki paidbah. Ia ka jingshisha, ia ka hok bad ia ka Nongrim ngan ym iapeiñ lano lano ruh”.
U la ther ruh ia ki nongmihkhmat kiba la rieh ha kyndong halor kane ka mat kaba ktah ia ka jingsngew bad ka jingeh ki paidbah. “Balei ki sngap jar, kylli ia ki MLA, MDC bad MP jong phi. Kiba bun ki tieng shuki, ki tieng spah – phew, ka nam bad ka burom, kine kin sa wan pat sha phi ha ka por Elekshon” khyrwit naphang u Bah Adelbert ia ki nongmihkhmat ka jylla.
Namar ka jingbitar ruh ia ka VPP kaba la suspen ia u na ka seng, u Bah Nongrum u la khyrwit tyngeh ruh ia ki Nongïalam u Prah ha kane ka rynsan da kaba kob ruh ba kiei kiei baroh kiba la jia kim dei ki jingbakla jong u hynrei ki dei ki jingthmu lypa jong ki na ka bynta jong u “mynta nga la laitluid namar ka Voice of the people’s party ka la sospen ia nga ngan iai pynsawa ngan iai rah bad iai kyntiew ia ka sur jong phi u Paidbah”.
“Nga khlem leh bakla, nga la dep ban pynpaw ha ki lad pathai khubor bad lada nga la leh bakla nga kloi ban dem khohsiew, nga kloi ban pan map, hynrei kim nud ban khot namar ki don jingthmu sha lyndet bad namar nga dei u briew ba kren, ki kwah ngan long kum u ñiang kohnguh. Ngan ym pyndem hano hano ruh bad ngan ym shah ban ialam bakla”.
U Bah Adelbert u la pynkynmaw ba ka Sorkar mynshwa ka pynbiej ba ym ju donkam Aadhaar ban ioh khaw rishon ne ban ioh ki jingmyntoi paidbah hynrei mynta ki bym don Aadhar kin duh lut ki jingïarap bad jingmyntoi paidbah. Ban pynkut ia ka jingkren, u Bah Nongrum u la pynshlur ia ki paidbah ba kin ieng skhem ha ka Nongrim bad ym shah ban ialam bakla bad ruh ban pyntikna ba ki bym treh ban pynrung kyrteng ban ioh Aadhar ruh ki dei ban ioh ia ka hok kumba ioh kiwei.
