U Myntri Rangbah ka jylla uba dei ruh u National President jong ka NPP u Conrad K. Sangma haba ai jingkren ha ka jingialang jong ki samla ka party NPP hapoh ka lama National People’s Youth Front (NPYF) ha nongbah Shillong (27/4/22) ula sangah jur ia u Dr. Mukul Sangma nongialam ka liang pyrshah uba dei ruh u Myntri Rangbah barim ka jylla halor ka jingkynthoh jong u halor ki kam khappud bad ka jylla Assam.
Haba kren halor ka jingkynnoh jong u Dr. Mukul Sangma ba u Conrad ula thok ia ki nognshong shnong ka jylla halor ka jingiasoi MoU hapdeng ka Assam bad Meghalaya, na ka liang u Conrad ula ong ba lada ka sorkar jong u ka thok ia ki briew ka jylla, balei pat ki briew na ka party jong u Mukul ki phet bad leit rung sha ka Party jong u (NPP). U Conrad ula ong ba ki liang pyrshah kila dei ban kylli shwa nalade ban iohi kaei kaba ki leh bad kaei kaba kila dep ban leh.
U Conrad ula iathuh ba ka jingshim rai halor u pud u sam kam dei ka kam kaba suk. Ka long kaba shitom bad kaba donkam ban shim ia ka jingiamir jingmut lang khnang ba yn lah ban pynduh ia kane ka jingiakynad halor u pud u sam. U la ong ruh ba ki nongshong shnong ka jylla kila ai ha ki ia ka bynta ban pyndep kumta ka long ka kamram jong ki ban wanrah ka jingkylla kaba bha ym ia ka jingbudnud hadien ha bud. Namar kane ka dei ka bynta kaba la sahteng mynta la 50 snem kynthih u la ong shuh shuh.
U Conrad ula pynshai ruh ha ka jingialang ba ia ka kyrteng jong ki shnong la dep ban phah shwa naduh u snem 2011 ha ka por ba long Myntri Rangbah u Dr. Mukul Sangma, kumta la da don kano kano ka jingshah ieh jong ki shnong kam dei ka jingleh jong ka ne ka sorkar ba mynta. U Dr. Mukul ula dei ban leit jurip ne iuhkjat ia kitei ki shnong naduh u snem 2011 bad ym mynta khnang ba kin ym shah ieh, la ong shuh shuh u Conrad.
U pynshai ba ka long kaba eh ban pynsngewthuh ia ka sorkar Assam namar ba na ka liang jong ka sorkar Meghalaya kala dep lypa ban phah ia ka list jong ki jaka bapher bapher sha ka sorkar Assam.
Haba phai sha ka jingthmu jong ka KHADC ban leit sha ka ïing bishar, une u khlieh jong ka NPP ula ong balei ba kito ki MDC kiba la iadon bynta lang ha ka jingiakren kim ong ei ei ha ka por ba dang biang hynrei mynta pat kila shim kabu politik pynban ia kane ka bynta u la kylli. U Conrad ula ong ba ki MDC jong ka NPP kin ym iadon bynta ha katei ka jingthmu jong ka KHADC.