Ka ding ba klang kala ioh ban bam duh ia kumba 50 haduh 60 tylli ki dukan die jingdie bapher bapher kiba don ha ka iew Ladrymbai Dongwah, East Jaintia Hills District, kaba la jia ha ka miet jong ka 27 tarik mynta u bnai ha ka por kumba 8:30 ei ei, hynrei kam don ka jingduhnoh jong ki mynsiew briew.
Haba kren sha ki lad pathai khubor na ka liang jong ki trai dukan kila pynpaw ia ka jingduhnong kaba khraw bha halor kane ka jingshah bam duh ha ka ding ia ki dukan jong ki bad kila kyntu ia ki bor sorkar ban ai jingiarap lem ia ki kloi katba lah.
Napdeng ki dukan kiba la shah bam duh ki kynthup ia ki dukan die marbam, dukan die jain, die Cosmetics, dukan die kot skul, kopi, shatri bad kiwei.
Na ka liang ki trai dukan kila pynrem jur ia ka jingpoi slem jong ki kali pynlip ding kiba la shim por haduh 15-30 minit ban poi sha kane ka jaka ba jia ka jingpluh ding, nalor ba don ki trok jong ka fire services kiba la poi khlem kit um kila kynthoh.
La iathuh da ki trai dukan ba ka ding kala nang jur shuh shuh na ka jingbthei jong ki 5 (San) tylli ki tyndong lyer shet (LPG cylinder).
Na ka liang jong ki VDP shnong kila suba ba kane ka jingpluh ding ka lah ban dei na ka jingbymshim khia ha ka jingpyndonkam ia ki gas cylinder kiba don ha kitei ki dukan. Kila iathuh ba ka ding ba klang kala neh haduh 3 kynta.
Na ka liang jong u Waheh Shnong ka Ladrymbai Dongwah ula ioh jingtip ia kane ha ka por kumba 9:00 PM bad mar mar na ka liang jong u, ula phone sha ka tnad Electrict ban pynlip ia ka bor lait. U WS ula iathuh ba kane ka jingpluhding ka lah ban jia na ka jingthut jong ka bor ding elektrik, ne na ka jingleh bym suid niew jong ki trai dukan khamtam ha kine ki aiom rang ryngkhiang ka mariang. Hynrei ula ong ba ka jingtohkit na ka liang ki Pulit kala iaid shakhmat ban lap ia ka daw ba thikna.
Kane ka iew ka dei kawei na ki jaka khaïi ba heh na ka bynta ki nongkyndong bad kane kala wanrah ia ka jingduhnong kaba khraw ia ki trai dukan bad ia ki nongshong shnong jong ka thain.
Uwei na ki nongshong dukan die marbam ula pyntip ba ula duhnong kumba Rs.7-8 lak tam haba ka ding kala bam duh khoit ia ka dukan jong u. Uwei pat u nongdie dukan Cometics ula dei na ka shnong Karimganj ula iathuh ba ka ding ka la bam haduh Rs.15 lak tyngka ki mar jong u. Haba shim kyllum ia ka jingduhnong ha kane ka jingjia kala kynjoh sha ki phew phew lak tyngka.
