Ka kong Isawanda Laloo, IAS kaba dei ka District Magistrate jong ka East Khasi Hills District mynta ka sngi kala pynmih ia ka hukum ban pyrkhing halor ka jingpyndonkam ia ki pataka kaba lah ban ktah halor ka jingsawa jur bad ruh ka jingpynjakhlia ia ka lyer kum ha kine ki sngi ba rakhe ia ka jinglehniam Diwali.
Kane ka jingpynmih hukum ka long ruh shi bynta ban bud ia ki kyndon bala pynmih da ka ïingbishar jong ka National Green Tribunal (NGT) katkum ka hukum ba la pynmih ha ka 29.10.2010 kaba kren shaphang ka jingiada ia ka lyer na ka jingktah jong ki bom pataka.
Kumta ka DM jong ka East Khasi Hills kala pynjari da ka kyndon 144 CrPC ban teh lakam halor kane. Katkum kane ka hukum yn khang ia ka jingdie ia ki bom pataka kiba dei na bar-ri. Yn ym shah ban thang shibun tylli ki bom pataka da kaba tehlang hajuh da ki bun bun tylli. La khang ban pyndonkam ia ki bom pataka kiba lah ban pynmih ia ka bor jingsawa kaba palat ia ka 125 dB (Al) lane 145 dB (C) pk ha ka jingjngai kaba 4 m na ka jaka ba thang ia ki.
La khang ruh ban pyndonkam ia ki jingpynbthei hapoh 100 m na ki jaka kum ki Hospital, PHC, ki Nursing Home, ki jaka pule, ki ïingbishar, ki jaka mane blei lane ha kino kino ki jaka ba kheiñ kum ki Silent Zone.
Hynrei kala don pat ka jingailad na ka liang ki bor pyniaid District bala shah ban thang ia ki bom pataka tang naduh ka por 8 baje mynmiet haduh ka por 10 mynmiet ha ka miet jong ka 24 tarik kaba dei ka sngi rakhe Diwali.
Ka don ruh ka jingpyrkhing ha ka rukom pyndonkam ia ki kor pynsawa, ha kaba ki nongpyndonkam ki dei ban bud ryntih katkam ka jingbthah ba la ai da ki bor pyniaid District.