U Myntri Rangbah ka Jylla u Conrad Sangma hynne ka sngi ka 2 tarik Jymmang u la lum ia ka jingïalang kyrkieh bad ka tnad Distaster ban pynkhreh na ka bynta ban iada halor ka jingwan lynshop ka bor mariang.
Ha kane ka jingialang la iadonlang naduh u Symbud Myntri Rangbah ka Jylla u Bah Prestone Tynsong, ka Myntri sorkar jylla ka Dr. Mazel Ampareen Lyngdoh, u Chief Secretary ka Jylla u Bah D P Wahlang bad ki heh ophisar na ka IMD, PHE, ka Koit ka Khiah, PWD, Power bad kiwei kiwei.
Na ka liang ki Deputy Commissioner bad ki ophisar na kylleng ki district jong ka jylla ki la iashim bynta lang ha kane ka jingialang lyngba ka video conferencing.
U Myntri Rangbah ka Jylla haba ai jingkren ha kane ka sngi u la shim jingkheiñ na ka bynta ka jingpynkhreh ka jingwan lynshop jong ka bor mariang. U la ong ka jingiatreilang hapdeng ki tnad bad ki seng bapher bapher ka long kaba kongsan ban pynkhreh ym tang ban pynduna ia ki jingktah hynrei ka pynthikna ruh ia ka jingpynkhreh kaba paka.
U la bynrap ruh ba dei ban pynbiang mardor ïa ki jingïarap, lada jia ba don kano kano ka jingjia. u Myntri Rangbah u la bthah ia ki Deputy Commissioner ban khot ia ki jingialang man ka por bad bynrap ba ki jingbthah kiba kyrpang dei ban ai sha ki shnong. U la pyntip ruh shaphang ki lad ki lynti ba la shim da ka sorkar ban pynbha ïa ki rukom ai jingmaham kloi bad bynrap, “Man la ka thaiñ ka don la ki jong ki jingduna bad ka sorkar ka dang shim ïa ki sienjam ban iakhun ïa ki jingma kum ka jingshlei um ha Garo Hills bad ka jingtwa khyndew ha Jaiñtia Hills bad ban thaw ïa ka rukom treikam na ka bynta ban tip kloi bad ban tip lypa.”
U Myntri Rangbah ka Jylla u la bishar bniah ruh ia ka jingdon jong ki nongtrei, ka jingbuh jingkynmaw/ki tiar kum ki kor pynkynriah khyndew, ki lieng bad kiwei kiwei. U la ong ruh ba ka surok, ka um bad ka bor ding ki dei ki bynta kiba kongsan kiba shah ktah jur bad u la bthah ia kine ki bynta ban pynkhreh kham bha.
