Ka tnad Information Technology and Communication hapoh ka jingkhmih jong ka Sorkar Jylla, ka la ioh ban sam ia ka khusnam hynne ka sngi ka 20 Kyllalyngkot 2025 sha ki samla pule jong ka Jylla kynthup ha ki tnad pule bapher bapher.
U Myntri Rangbah ka jylla, Conrad K. Sangma hynne ka sngi u la long kum u Kongsan ban sam ia katei ka khusnam IT Awards. Kane ka khusnam kadei kyrpang na ka bynta ki khynnah kiba la wan shakhmat ha ka jingpule, kata na ka bynta u snem 2023 bad 2024.
Kane ka dei ruh shi bynta ban iai ai mynsiem ia ki samla pule ka jylla khlem da kheiñ na kano ka kyrdan ba ki wan bad na kano ka longïing ki iaid lyngba. Nalor kata kane ka khusnam kan dei ruh kum ka jingkyrsiew thiah ba ka jylla kan iai kiew ha ka liang ka pule puthi.
Haba ai jingkren ha kane ka sngi, na ka liang u Myntri Rangbah u la ai Khublei ia ki samla kiba la lehbha ha ka jingpule jong ki bad u la ai mynsiem ruh ba kin nang iai bteng ban trei shitom na ka bynta ka lawei ba phyrnai. “Ka pyndap ia nga da ka jingkmen ban ioh ia kane ka kabu ban sam ia kine ki khusnam sha ki samla kiba kham kyrpang lane ki Nongjop. Ka jinglen lade bad ka jingtrei shitom jong phi shisha ka ai mynsiem. Kynmaw ba ka jingjop jong phi kam dei tang na ka bynta jong phi hi hynrei na ka bynta ka jingkiew jong ka Jylla. Katba phi dang bteng ban iai shah hikai bad iai san, ai ba kine ki kor technology kin long ki atiar na ka bynta ka lawei. Ka Nongrim kaba ngi buh mynta kan long ka jong phi ba phin saiñ dur ia ka lashai” ong u Myntri Rangbah.
