U Ma Wailadmiki Shylla, MLA ka 2 Jowai Constituency kum shi bynta ban iarap bad ai mynsiem ia ki khun samla jong ka ri lum Jaiñtia kiba pynkhreh ia ki exam bapher bapher kum ka UPSC, MPSC, DSC, SSC, banking bad kiwei kiwei, u la nohsynniang T.1,00,000/- (shi lak tyngka) sha kawei na ki jaka ai jinghikai (Coaching) ia kaba la tip kum ka Jaintia Career Coaching Centre (JCCC) ha ka jingialang kaba la long hynnin ka sngi (26/07/2022) ha ophis treikam katei ka Centre kaba don ma Moomon, Mihmyntdu.
Ha ka jingkren kum u kongsan u la ai mynsiem ia ki khynnah samla ba kim dei ban duh mynsiem ha ka jingpynkhreh jongki. U la bynrap ruh ba kidei ban trei shitom bad ban kut jingmut skhem khnang ba kin poi sha ka thong ha ka jingïaleh jong ki ha kitei ki exam bapher bapher.
Shuh shuh u la kyntu ba ki samla ka ri lum Jaintia ba ki dei ruh ban phai khmat sha ka seng kam lajong bad ban ïeng ha la ki kjat (Entrepreneurship) ym tang ban shu khmih lynti than tang ia ka kam sorkar.
Khatduh khatwai u la ai ruh ka jingkyrkhu kyrdoh ba ka centre kan nang kiew irat ha ki kam jingshakri barit jong ka.