Ka Federation of Khasi Jaiñtia & Garo People (FKJGP), West Jaiñtia Hills District, kala phah syndon da ka jingthoh sha u Deputy Commissioner ka West Jaiñtia Hills District, ban dawa pynlong biang ia ka NEET Exam namar ka jingshah pynklumar jingmut ki samla kiba ïakhun ïa kane ka Exam kaba la pynlong haka 5 tarik u Jymmang ha St. Mary Mazzarello Jowai.
Na ka liang jng ka seng hapoh ka jinglamkhmat u Wompher Wann ba dei u Vice President bad u Lidar Paia Dkhar u Legal Secretary kila leit ban aiti ia ka shithi lyngba ka Addl. Deputy Commissioner ka West Jaiñtia Hills District i kong H.M.L. Kynta, MCS, ha kamra treikam jong i.
Ka FKJGP kala pynpaw ka jingsngewdiaw halor ka jingbym biang ka rukom pynlong ïa ka NEET Exam ha nongbah Jowai kaba dei ruh ka sien ba nyngkong ban pynlong ïa kane ka NEET Exam ha Jaiñtia Hills ha kaba kila don haduh 400 ngut ki samla pule kiba ïakhun ïa kane ka Exam kiba la klumar ïa ka rukom ïoh ïa ki jingkylli.
La pynsngew ha katei ka Exam ki jingkylli (paper) kila wan ha ki ar bynta kata ka MNOP bad ka QRST bad kane kala pynklumar ïa ki samla ba leit thoh exam kiba la hap ban jubab lang ïa kitei ki jingkylli baroh ar, nalor ba ki hap ban ap palat ïaka por ba la buh ban thoh exam.
Kumta halor kane ka jingeh jong kitei ki samla ba ïakhun NEET Exam ka seng ka kyntu jur na ki bor sorkar ban kan pynlong biang ïa kane ka Exam ha Jowai na ka bynta ka jingmyntoi jong ki samla, kiba la pyllut ïa la ka bor bad por jong ki haba pynkhreh ïa kane ka Exam ba kongsan bha na ka bynta ka lawei ba phyrnai jong ki.