Ka Dorbar Shnong Nongspung ha ryngkat bad U MLA ka Mawphlang bah Matthew Beyond Star Kurbah hynne ka sngi ka 21 tarik Jymmang 2025 ki la leit ai da ka dorkhas ha u Myntri ka tnat kam jngohkai pyrthei u Bah Paul Lyngdoh ban iarap pisa na ka bynta ban kyntiew ia ka kam jngohkai pyrthei hapoh ka shnong Nongspung.
Haba kren sha ki lad pathai khubor u Rangbah Shnong ka shnong Nongspung u bah John Kharmyndai u la ong ka jingwan kynduh ia u myntri ba peit ia ka tnad kam jngohkai ka dei halor ka jingdon ki jaka hapoh shnong kiba itynnad kiba lah ban khring ia ki nongwan jngohkai pyrthei.
Na ka liang u MLA ka Mawphlang u bah Matthew u kyrpad ia u Bah Paul Lyngdoh ban iarap pisa na ka bynta ban kyntiew ia ka kam jngohkai ha kane ka shnong.
Shuh shuh u la ong ka Mawsangri ka dei kawei na ki jaka kaba hap ha Nongspung ka don ruh ia ka khana kaba la hiar pateng bad ka dei ka kmie jong u Kyllang bad u Symper. Kumta ka Dorbar Shnong ka sngew ba ka donkam ban pynneh pynsah ia ka Mawsangri da ka jaka kaba khring ia ki nongwan jngohkai pyrthei khnang ba kane ka jaka kan neh bad kan pawnam kum u kyllang bad u Symper.
Khatduh iawai na ka liang ka shnong kan sa pynkhreh ia ka DPR (Detail Project Report) ka jinglut na ka bynta kane ka kam bad kumjuh kin sa phah sha u Bah Paul Lyngdoh khnang ba ka sorkar kan iarap na ka bynta ban kyntiew ia ka kam jngohkai ha kane ka thaiñ.