Ka Mawkynrew Sohphlang Eco-Cultural Indigenous Society ka la wan ban pyntip paidbah mynta ka sngi ka 27 tarik Nailur ha Shillong Press Club ba sa shisien kan sa pynlong biang ia ka Sohphlang Festival ha ka 25 bad 26 tarik u bnai Risaw 2024, ha Lad-Kharang Mawkynrew East khasi Hills.
Ka jingpynlong ia kane ka sohphlang Festival ym tang ba ki buh ia u sohphlang, hynrei kin sa buh ruh bad kiwei kiwei de ki marrep, ban pyni paidbah ha kine ki arsngi kata ha ka 25 bad 26 tarik Risaw.
Ia kane ka Festival yn sa wan ban plie da ka myntri ka rep ka riang ka Dr Ampareen lyngdoh ha ka 25 tarik risaw 2024 bad ha sngi pynkut kata ha ka 26 tarik risaw 2024 yn wan da u Myntri rangbah ka Jylla u Conrad K Sangma.
Ha ba kren sha ki lad pathai khubor ha Shillong Press Club mynta ka sngi Nailur, ki nongialam jong kane ka kynhun ki la iathuh, ba mynshem snem ka jingpynlong ia kane ka Festival ka iaid beit iaid ryntih bad ki paidbah ki la ai ka jingkyrshan halor ka jingpynlong ia kane ka tamasa namar ka long ka ba iarap shibun ia ki nongrep.
Ki la ong ruh, ba ka jingpynlong biang ia kane ka tamasa kadei namar ka jingkyrpad ki paidbah nongshong shnong ka thaiñ ba ki kwah ban pynlong sngewbha biang ia kane ka tamasa namar ka iarap shibun ia ki nongrep sohphlang.
Na ka liang u bah Karmel u ba dei u adviser ka kynhun u la ong, ba ki paidbah haba ki wan thied ia u sohphlang kim donkam shuh ban song ha ki kot hynrei la dep ban song lypa ha ki jingsong, ban pynsuk ia ki ba wan thied.
Ki nongrep ha ka thaiñ mawkynrew ki ioh ia shibun ki jingmyntoi ha kaba iadei bad ka jingpynlong ia kane ka tamasa bad ka kynhun ka la khot la wer ia baroh ki nong shong shnong hapoh ka Jylla ki ba rep ia u sohphlang, ban wan lang ha katei ka sngi ba pynlong ia kane ka tamasa bad ka jingpynlong ia kane ka tamasa shibynta ban kyntiew ia u sohphlang bad ban kyntiew ruh ia ki nongrep ka thaiñ.
