Ka Seng Khasi Kmie, kan pynlong ia ka tamasa ‘Na -Thymmei Festival’ ka ban iaid ar sngi, kata ha ka 26- 27 Risaw 2024 ha Madan Weiking Jaiaw , ia kane la pyntip da u Dkhot ka Cultural Committee ka Seng khasi kmie, u Bah Ehsing Khiewtam ha ka jingiakynduh bad ki ladpathai khubor kaba la long ha ka 15 Tarik Risaw 2024.
Haba kren sha ki ladpathai khubor, u Bah Ehsing Khiewtam u la iathuh ba ka Seng khasi kmie kan pynlong ia ka Tamasa kaba la ai kyrteng ‘Na-Thymmei, Celebrating the Essence of Indigeneity” kaban long kum shi bynta ban kyntiew ia ka Kolshor jong u khun khasi, ha ka kam jngoh kai pyrthei bad kumjuh ba kan don kaba kham jan shuh shuh hapdeng ki paid ka bri U Hynñiewtrep Hynñiewskum.
U la ong ruh ba lyngba ka jingpynlong ia kane ka tamasa, kan khring ĩa shibun ki paidbah Mongwan peitkai namar ha kine ki sngi, yn sa pyni ia ka jinglong tynrai ïa kiba dang pynneh kum ha ka shad ka put tynrai, ki Sawang ka ba la pynwandur bad pynshong nongrim halor ka pyrkhat Khasi, kan don ruh ka jingbatai ïa ka long tynrai na ki riewstad kiba la dep ban ngam jylliew ĩa ka long Tynrai, nalor kine kan don ruh ka jingiakob pyni riam tynrai ia kaba la khot ‘Ka Lukhimai bad U Nai Khadsaw Synñia’.
“Ha kane ka tamasa, yn iohi ia ka shad ka put tynrai kaba ngim ju kham iohi shuh ha kane ka juk mynta. Kin wan ban iashim bynta, ym tang ki briew na sor Shillong hynrei baroh ki jaka ba don ha ki kyndon jong ka Ri Khasi – Jaiñtia, bad ruh ka jingdie ia ka jingbam tynrai ” ong u Bah Khiewtam.
Haba kren halor kane ka tamasa na ka liang u Publicity Secretary ka Cultural Committee ka Seng khasi kmie, u Bah D. Suaim u la iathuh ba ka Seng khasi kan ioh ban pynlong ha ka sien ba lai ia kane ka tamasa ‘Na Thymmei Festival’ ha kaba la ioh lad ban wanrah ia ka jinglong tynrai jong u khasi na kylleng ka bri u Hynniewtrep, lyngba kane ka rynsan .
“Ka Bei tyngka ban pynlong ia kane ka tamasa kan long 75 % na ka sorkar Jylla katba 25% kan bei hi ka Seng khasi, kumta u la khot la wer ia baroh ban wan shim bynta ha kane ka tamasa tynrai kaban sa pynlong da ka Seng Khasi” u la ong.
Na ka liang u Secretary ka Cultural Committee ka Seng khasi kmie, u Bah Hammarsing Kharnaior u la ong ba ka jingthmu ban pynlong ia kane ka tamasa ka long ban pynpaw ia la ka Lariti, khamtam mynta ba ki la duna ka jingtip bad ka jingiohi bad lyngba kane ka ‘Na Thymmei Festival’, la ju iohi ia ki jinglong tynrai na kylleng.