Ka kompeni trei mon sngewbha ka IORA Ecological Solution kaba don ha Delhi, ka la pynpaw ïa ka jingangnud jong ka ban ïatreilang bad ka sorkar jylla bad ki lai tylli ki Autonomous District Council ban pynkylla ïa ka jylla Meghalaya sha ka green economy hub jong ka ri India.
Haba ïakren bad ki nongthoh khubor ha ka 11 tarik Rymphang 2025 hadien ba la ïakynduh ïa u CEM ka KHADC, u bah Pyniaid Sing Syiem u CEO ka IORA Ecological Solutions u Swapan Mehra u la pyntip ba ki la ïatreilang bad ka sorkar Meghalaya, ka KHADC bad ka JHADC bad ka GHADC halor ka jingïarap ïa ki paidbah bad ki nongrep ha Meghalaya ban ïoh ïa ka dor kaba bha tam na ka bynta ka carbon financese jong ki.
U la pyntip shuh shuh ba ka kompeni ka don ka jingiatreilang bad ka bank rep kaba heh tam ha ka pyrthei kaba don ha Netherland, ka Rubber Bank, ban pynwandur ia kane ka prokram ha ka Jylla da kaba bynrap ba ki thmu ban pynmih pisa ia ka carbon kaba nyngkong jong ki ha ki ar lai bnai ban wan.
Ha kajuh ka por, u Mehra u la pyntip ba ki la board kumba 19 hajar hectare bad kumba 9000 ngut ki nongrep ha ka digital platform jong ki, bad ka thong jong ki ka long ban rah ia kane sha ka 100 hajar hectare.
U CEO ka IORA Ecological Solutions u la ong ruh ba ka KHADC hapoh ka jingialam jong u CEM ka la ai ka jingkyrshan ia ki na ka bynta ban pynwandur ia kane ka prokram naduh kaba sdang.
Ka KHADC ka la iarap ia ka kompeni ban pyniasoh bad ki paidbah bad iarap ban pyntip lyngkot ia ki paidbah shaphang ka dor jong ka carbon bad ka jingdonkam jong ka carbon bad kiwei kiwei kum kine ki jingpynlut pisa na ka bynta ka mariang.
Katkum ka jingong jong u, ka council ka la tyrwa ruh kum shi bynta jong ka jingïatreilang ka la ailad ïa ki ban pyndonkam ïa ki nursery jong ki bad ka tnad khlaw jong ka Council katba ka long kaba ai jingmyntoi ïa ki nongrep bad ki paidbah ban ïarap ban kyntiew ïa ka ïoh ka kot jong ki.
“Kumta kane ka dei ka jingiatreilang jong ngi. Mynta ngi dang ia kren ruh bad kiwei pat ki nongbei tyngka. Kawei na ki ka dei ka US based firm, ka USDC kiba thrang ban bei tyngka ha Meghalaya. Ka jingsngewtynnat jong ngi ka long ban ïai bteng ban ïatreilang ha kane ka liang ryngkat bad ka sorkar bad ki ADC ban pynurlong ïa ka thong kaba ngi la buh,” u la ong.
Shuh shuh u la pyntip ba u Myntri Rangbah ka Jylla Conrad K Sangma ha u snem ba la dep u la sdang ïa kane ka prokram bad u la leit ruh wat sha katei ka workshop kaba ki la pynlong.
Ha kajuh ka por, u CEM ka KHADC, u bah Pyniaid Sing Syiem u la pyntip ba ka konsil ka la iatreilang bad ka IORA Ecological Solutions la shisnem mynta ban pyntreikam ia ka Agro Forestry Carbon Finance Project.
Shuh shuh u la ong kane ka company na Delhi kan iarap ban pynsngewthuh ia ki Nongrep ban pynneh pynsah ia ka mariang bad ban ioh jingmyntoi lyngba ka Payment for Ecosystem Services Scheme ka ba la sdang da ka sorkar jylla.
U Bah Pyniaid Sing Syiem u la ong ba ka council ka thmu ban pyniar ia ka jingiatreilang bad ka tnad pla tyngka kaba don ha US, ka International Finance Development (IFD).
U la pynpaw ka jingkmen ba kin lah ban iada ia ki jaka khlaw da kane ka projek.
Kat kum ka jingong jong u, ka konsil kan pyrshang ruh ban wanrah ïa ka jingim kaba neh sha ki nongrep da kaba shim kabu ïa ka ïew kaba don ïa ka carbon credit.
Lah ban kdew ba ka Payment for Ecosystem Services Scheme ka ai jingmyntoi lyngba ka jingkyrshan pisa kaba T.8 hajar shi hektar ha ka shisnem na ka bynta san snem, u la ong.
Hapoh kane ka skhim, yn ai khusnam shuh shuh kaba T. 5,000 shi hectare ha ka shisnem sha kito ki khlaw mariang kiba la register kum ki community reserves ha ka tnad khlaw bad T. 2,000 shi hectare ha ka shisnem sha kito kiba don ka khlaw kaba jylliew bha lane kiba la ithuh tynrai kum ki khlaw ki btap.
