U ma Khroo L Pariat kum uwei na ki kyrtong u ban ïakhun ïa ka Election MDC kum u Kyrtong shimet na 7-Jowai North Constituency, ula buh ka jingkyntu sha baroh ki Dorbar Shnong ba kin shimkhia ban pynbeit bha ïa ka rukom ïalap Election MDC mynta u snem, khnang ban ym ktah ïa ki khynnah kiba ïakhun ïa Examination SSLC bad HSSLC ka ban sdang naduh ka 10/02/25 – 06/03/2025.Ula kyntu jur ïaki Dorbar Shnong khnang ban nym ktah ïa ka por jong ki, ula ai jingmut ban pynlong da ka Common Platform ba shisngi ha manla ki Dorbar Shnong, kaba long kawei na ka rynsan ïa ki kyrtong ban ïoh pynsngew ïa ki nongrim jong ki.Shuh shuh ula kyntu ïa ki DS ba kim dei ban shah ïa ki briew bad ki kali na kiwei pat ki shnong ban wan rung shapoh ki shnong ba don ka jingïalap Election (Common Platform).Ban lait na ki jinghuri hura ha ki shnong ki thaw ula dawa ban pynsangeh shi syndon ïaka jingïabam doh miet, ki jingleit bam khana, ka jingtem ïa ki sur bad ka jingshad Election haka por mynmiet hapoh ki shnong. Ula ai jingmut sha ki Dorbar Shnong lada don kino kino kiba pynkheiñ ïa ki jingmana shnong ki dei ban shah pynshitom katkum ki kyndon aiñ jong ka shnong.U ma Pariat ula buh ka jingkyntu lang ïa baroh kiba don ïaka hok ban thep vote, ki dei ban pyndep hok da kaba leit mih sha ki jaka thep vote bad ban jied ïa u ne ka nongmihkhmat kaba kila ibit.