U Chief Minister ka jylla u Conrad K Sangma mynta ka sngi ula ioh ban aiti ne pynioh kot khyndew kaba pynshisha ia ka jinglongtrai jaka sha ki 1200 tam ki nongshong shnong kiba don ha ka shnong Balsrigittim bad Warimagre hapoh Williamnagar Township ha East Garo Hills District.
Ia kane ka jingpynioh kot khyndew la aiti da u CM ha ka jingiadon ryngkat u MLA ka thaiñ u Marcuiuse Marak. Kine ki 1200 tam ki nongshong shnong kidei kiba la shong la sah hapoh ki jaka sorkar da ki bun bun snem bad ki sngewdonkam ban ioh noh da ki kot ki sla ban pynskhem ia ka jinglong trai jong ki.
Ka jingbym don kine ki nongshong shnong ia ki kot khyndew kiba skhem ka wan rah ka jingeh kaba khraw ia kine ki nongshong shnong ban ioh ia ki lad jingiarap na ka liang ka sorkar bad khamtam ha ba ki donkam ban pan ram na ki Bank ne na kiwei pat ki tnad sorkar ong u CM.
U Sangma ula iaroh ruh ia ka jingtrei shitom jong u MLA ka thaiñ u Marcuise Marak ula wanrah ka jingiatylli hapdeng kine ki nongioh bynta ban pynlong ia kane ka jingthmu kaba jop.
Ha kane ka jingialang u CM ula ioh ban aiti dalade ia ki kot khyndew (Land Settlement) sha ki 17 tylli ki long ïing ka shnong Balsrigittim bad 6 ki long ïing ka shnong Warimagre.
