Ka All Hynñiewtrep People United Front (AHPUF), hadien ba ka iohi ba ka don ka jingma kaba ap ia ki nongleit nongwan na ka daw jong ki Diengkseh kiba don ha ophis DTO Jowai, Mihmyntdu Moowamon kaba dei ka jaka jong ka Meghalaya Transport Corporation (MTC), Jowai, kila tymmen ne jlop noh, kumta ka seng kala leit ban buh da ka jingthoh sha ka ophis MTC ba kan leh ia kaba donkam.
Na ka liang u President John Phawa bad u General Secretary ma Chandame Sungoh, ki la ong ba kine ki diengkseh ki dei kiba la heh ne kiba iaw ka rta, kiba don harud u surok NH-6, bad kane ka lah ban buh jingma ha kano kano ka por ia ki paidbah nongleit nongwan khamtam ki khynnah skul kumjuh ruh ia ki kali motor kiba iaid lyngba kane ka surok. Kumta khnang ban lait na kano kano ka jingjia ba sngewsih ka seng ka la kyrpad ia kane ka tnat ban pom noh ia kine ki diengkseh namar kumba long mynta haduh ki tant ba iar jong kine ki dieng kseh ruh ki la pyiar sha ki bynta jong u surok.
Shuh shuh na ka liang u ma Sungoh u la ong ba ka seng ka kwah ruh ban kyntu ia kiwei pat ki tnat ophis ne ki trai jaka jong ki riew shimet kiba don ki dieng kiba la jan khyllem kiba don kum ha ki rud lynti syngkieng ne ha kino kino ki jaka kiba lah ban buh jingma ia ki briew ba ki dei ban ot ne pynkhyllem noh ia ki katba dang biang ka por khnang ban lait na ki jingjia ba sngewsih.
