Ka KHNAM mynta ka sngi ka 19 tarik 2024 hapoh ka jingialam jong u Working President ka Seng u Bah Thomas Passah ki la Shong kyllian myngngor ha Madan Malki. Ka jingsdang jong ka KHNAM ban Shong kyllaiñ myngngor ka dei namar ba ka Sorkar kam pyntreikam ia ka aiñ ban pynduh noh ia ki Person interview ha ki Post Grade B bad Grade C kum ba la pynsngew da ka KHNAM na ka por sha ka por, hynrei ka sorkar ka leh mynthi bad kam shah shkor da ka jingbitar mynta ka sngi ka la pyni da ba Shong kyllaiñ myngngor kaba shisngi ban dawa na ka sorkar ban pynduh noh ia kane ka Personal interview.
Haba ia kren sha ki lad pathai khubor mynta ka sngi u Working President ka KHNAM u Bah Thomas Passah u la ong ba kane ka Personal Interview baroh ki tip ba ki ba dei hok ban ioh ia ka kam ki khlem ioh bad u la pyntip ba ine i jingdawa i dei iba rit bad ban pynmyntoi ia kiba bun ki samla ha ka jingthep ia ki kam sorkar na bynta ki post barit.
Shuh shuh na ka liang jong u Bah Thomas Passah u la ong ba ka jingsngap mynthi jong ka Sorkar ban pynduh ia kane ka personal interview ka pynshisha ba ka thung kam sopsop ia ki briew ba ka Sorkar ka mon.
Kumban shu pynkynmaw ka Sorkar India ka la pynduh ia kane ka Personal interview naduh u snem 2016 bad kumba 23 tylli ki State hapoh ri India ki la pynduh ia kane ka Personal interview bad kaei kaba khanglad ia ka sorkar Meghalaya ban pynduh noh ia kane ka kam ka thew tang kawei ba lada ka sorkar ka pynduh noh ia kane ka personal interview ka mut kim ioh shuh ban thep kam tuh ha ki post bapher bapher, bynrap u Thomas Passah.
