U ma Khroo L. Pariat uba dei uwei na ki nongtrei mon sngewbha ha ka ban pynkhlaiñ ïa ka imlang sahlang, khamtam ïa kiba trei kam bylla sngi ha ka jylla bad khamtam ha ri lum Jaiñtia ula ong ba kam long kaba lah ban pdiang ban pynduh ïa ka hok ki nong Jaiñtia.
“Ka jingdawa ban pynbeit biang ne pynthymmai ïa ka rukom ai bhah ha ka pule puthi bad ha ka bhah ïoh kam sorkar (State Reservation Policy) dei ban kyrshan borbah naduh ki Jaitbynriew Garo, Khasi bad Jaiñtia bad kiwei pat ki Jait bynriew kiba la ithuh da ka aiñ ki kyndon ka sorkar ha ka jylla Meghalaya. Hynrei lada don pat ki nongïalam ha jylla kiba pyrkhat ban pynduh ïa ka Jaiñtia ne kiwei pat ki Jaitbynriew na ka Reservation Roster Policy ka jylla kiba la ithuh da ka Aiñ, kum kata ka jingthmu ka long kaba bakla bad kaba ym dei ban pdiang dalei lei ruh em” ong u ma Pariat.
Shuh shuh u Ma Pariat ula ong ba ïa ki Jaiñtia la dep ban ithuh da ka aiñ naduh ki phew snem mynshwa kaba ki Phareng ki ithuh ruh ka Ri Khadar Dolloi, hynrei lada mynta ïa ki Jaiñtia yn thmu ban pynduh bhah ïa ka ha ka thung kam bad ha kiwei de kane kan wan ka jingpyrkhat kaba khyllah bad ka jingtim. Kumta u kyntu bad dawa ba dei pynbeit biang ïa kane ka Reservation Policy kaba la palat San phew snem mynta, ha kajuh ka por kam deipat ban wanrah ïa ka jingïapher ka jingïaleh markynti hapdeng ki jaitbynriew ha ka jylla bad ka Ri India.
Ha ka juh ka por ula dawa ruh na ka sorkar jylla ba ka dei ban ai bhah (Reserve) 10% na ka bynta ki khun jong kito ki longïing kiba kamai da kaba bylla sngi, ki Muster Roll, ASHA, Anganwadi, nongtrei bylla ïing briew, Nonghikai SSA, nongtrei Contractual bad kumjuh ïa ki nonghikai skul bad kiwei kiwei ki nongtrei shipor kiba kamai tang hapoh 20 hajar tyngka ha ka shi bnai khnang bakan ïa biang ïa bit lang ha ka jingim kumba long lem kiwei kiba biang ka kamai spah.
Namar ha kine ki San phew snem ba la leit noh, kiba bun kiba ïoh bhah ki dei ki khun jong ki ba heh ba haiñ kiba ïoh ban phah pule ïa ki khun jong ki na ka bhah jong ka sorkar, halor kane ka bynta ka sorkar jylla kala dei ban pyrkhat lang ïa kiba duk ba rangli ki Jait bynriew trai jylla Meghalaya.