U Symbud Myntri Rangbah ka jylla, u Bah Sniawbhalang Dhar uba dei ruh u Myntri ba khmih ia ka tnad pynroi Sor (Urban Affairs) hynne ka sngi u la pyntip paidbah ba ka tnad Urban Affairs ka la dep ban rai na ka bynta ban pyntreikam noh da ka ‘Meghalaya Parking Policy’ lane kata ka aiñ ban pyrkhing ia ka jingpynieng kali pathar ha jaka sor.
Ha kaba iadei bad kane ka buit ba thymmai, u Bah Sniawbhalang u la ong ba shen ki jaka ïeng kali kin sa mih bun ha sor Shillong kaba dei kawei na ki lad ban pynduna ia ka jingkhapngiah kali. U Dhar u la iathuh ruh ba la dep ban shna ia ka rukom pyniaid ba thymmai ha kaba iadei bad ki jaka ieng kali (parking) bad kan don ruh ka jingpyrkhing ban nym shah ieng pathar shuh ia kino kino ki kali namar kane kadei kawei na ki daw ba wanrah ia ka jingdheng kali. U la pyntikna ba ia kane ka aiñ ba thymmai yn treikam noh shen.
Nalor kata, u la ong ba ka jingwanrah ia kane ka buit ka long ban ïakhun ruh ia ki kam sniew ba bun jait. “Hooid ym lah ban len lada ngi pyndonkam da kano kano ka lynti ruh ka jingdheng kali ka don beit hynrei ka don pat ka jingpher na kaba nyngkong” ong u Symbud Myntri Rangbah.
Kawei na ki lad ba ka Sorkar ba ka la wad na ka bynta ban pynduna ia ka dheng kali ka dei da kaba pynkynriah ia ka sor ba thymmai (New Shillong) sha Mawdiangdiang, ong u Dhar.,”Na ka liang ka sorkar man ka por hi ngi iai iakren bad iai leh ruh ia ki kam naduh mynshwa haduh mynta ha kaba iadei bad kane ka mat. Ngim ju shong kli kti, bad ki bor pulit ruh man ka por ki pynkylla ia ka rukom pyniaid na ka bynta ban iakhun ia ka jingdheng kali.
U Bah Sniawbhalang u la pyntikna ruh ba la dep ban pdiang ia kane ka aiñ bad yn ym don mano mano ba lah ban iaid lait na kane ka jingpyniaid ba thymmai.